Меню
16+

Сетевое издание "Району яшаву"  «Будни района»

25.03.2022 10:22 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Ич татавуллагъа да тергев тарыкъ

Автор: Шихав Къайирбеков

Март айыбызны да тамамланма 5-6 гюн къалгъан, шону булан къышыбыз да битежек. Язбашны геливю булан районда авлакъ ишлер масса кюйде башлана. Айтма тарыкъ, бу язбашда топуракъ булан доланма сюеген, къасты бар ёлдашланы санаву хыйлы гётерилген. Бир де топуракъда доланмагъан ёлдашлар да бахча, овош оьсюм­люклер чачма къасты барын англата.

Оьсюмлюклеге къуллукъ этивню, аврувланы алдын алывну сырларын ахтара туруп болалар. Шо нечакъы да яхшы. Базарларда сурсат продукталаны багьасы гьатдан озуп барагъан вакътиде, гьар адам ожакъны бюджетини гьайын, агьлюню уьюрлерин сурсат булан таъмин, оланы запасын болдурмакъны гьайын этме тарыкъ.

Бизин районну топуракъларында къайсы оьсюмлюкню де оьсдюрме, яхшы тюшюмлер алма бола. Амма топуракъ булан доланма токъташгъан ёлдашлар ерли шартланы, топлангъан бай сынавну гьисапгъа алып иш гёрсе, яхшы болар.

Авлакъ ишлеге гьазирлик гёрювню, ишлеме токъташгъанланы гьакъында айта туруп, муниципал къурулувланы топуракъларындагъы ич татавулланы гьакъында айтмай къойсакъ, тюз болмас. Сугъарыв сувланы асувлу къоллавда, сугъарыв ишлени чалт оьтгеривде ич хозяйство татавулланы гьалындан кёп зат гьасил бола. Айтма тарыкъ, районну муниципал къурулувларындагъы ич татавулланы гьалы йымышакъ айтгъанда ярайгъан зат тюгюл. Айрокъда, Къурбуки юртну Манас зонадагъы топуракъларындагъы ич татавуллар тазаланмагъаны 10 йыллар болагъан ерлери бар. Къарабудагъгент юрт муниципал къурулувундагъы бир-бир ич татавулланы гьалы да шолай. Татавулланы лайыкъгъан къамуш битген ерлери кёп.

Юзюм, емиш бавларда вегетатив (оьсюв) сугъарыв ишлер башланажакъ. Участкаланы сугъарма гиришгинче, ону ичин тазаламакъны чаралары гёрюлсе, яхшы болур.

Айтма тарыкъ, татавулланы тазалама техника табып болмайгъанлар да бар. Техникасы бар ёлдашлар да этген къуллукъларына гьаттан оздуруп артыкъ багьа алалар. Бу ишде юрт администрацияланы ёлбашчыларына юрт хозяйство, чачыв ишлер булан доланма сюегенлеге техника булан болагъан кёмегин этме тюше.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

2