Тюшюм учун гьаракат юрюле
Язбаш ювукълашып гелегени гьис этиле. Тав бетлени оту гёгерип геле. Жымчыкълар, сыйырткъычлар чарнама, уя тикме башлагъан. Булар барысы да язбаш ювукълашып гелегенини аламатлары. Язбаш юртлу загьматчылар учун да жаваплы ва къыставлу заман. Йылны бу заманында мол тюшюмлеге мугькам кюрчю салма айлана туруп, юзюм, емиш бавларда йылны бу заманында этилме тарыкълы къуллукъланы сан янлы кюйде оьтгермекни гьайында болма тарыкъ бола.
Районубузну авлакъларында, юзюм бавларда тюек бутав, сыдра араланы сюрюв, сыдра аралардагъы чырхыны чыгъарыв, шпалерлеге ремонт этив ишлени барышына гёз къаратайыкъ.
Юрт хозяйство производствода юзюмчюлюк – лап хайырлы ва шо бир вакътини ичинде адамланы иш булан таъмин этеген тармакъ. Шогъар гёре артдагъы йылларда районда юзюмчюлюк тармакъны майданларын генглешдирмек учун кёп тергев бериле.
Хас маълуматлар исбат этеген кюйде, буссагьатгъы вакътиде районубузну муниципал къурулувларыны топуракъларыны 2111 гектар майданларын юзюмлюклер бийлеген. Шо участкаланы 1600 гектардан да къолайы планлы кюйде тюшюм береген юзюмлюклер.
Борла кёп къуллукъну талап этеген оьсюмлюк. Гьар бир къуллукъну агротехника гёрсетеген болжалларда сан янлы кюйде оьтгерме тюше.
Мол тюшюмге кюрчю салывда тюекни къуру бутавун сан янлы кютювден кёп зат гьасил бола. Озокъда тюекни бу къуллукъларын борлагъа сув тюшгюнче тамамлама таклиф этиле.
Айтма тарыкъ, гетген-йылны гюз-къыш айлары ва бу йылны къышы топуракъда доланагъанлар учун онгайлы гелди. Шогъар болма да ярай районну юзюмчюлери юзюмлюклердеги ишлени бир мюгьлетге де токътатмады десек де янгылыш болмас.
Буссагьатгъы вакътиде районубузну ичинде лап да уллу юрт хозяйство предприятиелер: агрофирма «Герей-тюз» 102 гектардагъы юзюмлюклерини тюегин бутап битген. «Дагнефтепродукт» ОАО-33 гектарны бутагъан, КФХ «Шанс» бутав ишлерин битген.
Мол тюшюм учун ябушув юрютювде “Далап” СПК-ны уьюрлери де яхшы сиптечилик гёрсетелер. Мунда да бутав ишлер ювукъ гюнлени ичинде тамамланажакъ. СПК-ны ёлбашчылары юзюмлюклени ерли кюйлевючлер берип азыкъландырмакъны гьайын да этелер.
Борлагъа къуллукъ этив гьаракат топуракъда айрыча доланагъан ёлдашланы гьаракаты да макътавгъа лайыкълы.
Бир сёз булан айтгъанда, районда тюекни бутав ишлери къурумлу юрюле. Буссагьатгъы вакътиде районну планлы кюйде тюшюм береген юзюмлюклерини тюеги буталып битген деп ташдырып айтма болабыз.
Юзюмлюклени сыдра араларын сюрюв, шпалерлеге ремонт этив, сугъарыв ишлер де узатылып тура. 2 минг гектаргъа ювукъ юзюмлюклени сыдра аралары сюрюлген.600 гектардан да къолай майданлардагъы юзюмлюклерде дым сакълав сугъарыв ишлер оьтгерилген. Бугюнлерде де юзюмлюклерде оьрде атлары эсгерилген ишлер узатылып тура.
Артдагъы йыллар юзюмчюлер мол тюшюмлеге кюрчю салывда участкаланы минерал, ерли кюйлевючлер берип азыкъландырыв ишлеге де айрыча агьамият берме башлагъаны да къувандырмай болмай. 247 гектар ердеги юзюмлюклер азыкъландырылгъан.
Чакъгъа исси тюшгендокъ юзюмлюклени сыдра араларындагъы чёп отлагъа къаршы агъулу дарман (гербецид) урма гьазирлик гёрюле.
2022-нчи йылны тюшюмюне мугькам кюрчю салма къаст салгъан юзюмчюлерибизни, механизаторларыбызны гьаракаты макътавлу.
Бары гюч борланы гьар-бир къуллукъларын оьр даражада кюте туруп, мол тюшюмлеге кюрчю салма бакъдырылгъаны авлакъ ишлени барышындан гьис этиле.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
