ДР-ни Башчысыны тапшурувуна къаралды

Генгешни барышында ДР-ни Башчысыны заманлыкъгъа борчларын кютеген Сергей Меликовну топуракъ гесеклени гьисабы ва шоланы инвентаризация этивю гьакъда берил­ген тапшурувланы яшавгъа чыгъарылыву гьакъда баянлыкълар булан сёйлемеге район администрацияны топуракъ ва мюлк аралыкълагъа къарайгъан бёлюгюню ёлбашчысы Солтан Халиловгъа сёз берилди.

С. Халилов оьзюню сёйлевюнде оьзю ёлбашчылыкъ этеген бёлюкню топуракъ гесеклени инвентаризация этивю гьакъда мекенли кюйде айтды. Демек, эсгерилген топуракъ гесеклер муниципал, регион ва федерал есликде экенлигин эсгере туруп, шо топуракъланы законлу кюйде къолламагъа ва пайдаландырмагъа тарыкълыгъы гьакъда бирдагъы керен ташдырды.

Олай да, С. Халилов эсгерген кюйде, ерли юрт администрациялар юрт хозяйство управление булан бирче 2021-нчи йылны февраль айыны 1-и болгъунча бары да топуракъ гесеклер тийишли кюйде къолланагъанына тергев болдурмагъа борчлу. Шо топуракъланы инвентаризация этивюню гьасилин районну администрациясыны топуракъ ва мюлк аралыкълагъа жаваплы бёлюгюне оьз заманында етишдирмеге герек.

«Шоллукъда, 2020-нчы йылны декабр айыны ортасына районну ичинде умуми алгъанда 142 минг 532 гектар майданда топуракъ бар. Шоланы 324 минг 500-ю – федерал, 13 минг 400-ю – республика ва 94 минг 600-ден къолайы – муниципал есликде», — деп маълуматлар берди С. Халилов.

С. Халиловну баянлыкъларына гёре, районну ичиндеги бары да юртларда дазулары мекенлешдирилмеген топуракъланы майданы 14 623 гектар бар. Шоланы 13 мингден артыгъы – Къурбуки ва Паравул юрт администрацияланы топуракълары.

Олай да, генгешни барышында район администрацияны жаваплы къуллукъчулары ва юртланы гьакимбашлары гётерилген масъалагъа гёре оьзлени соравларын бердилер, пикруларын айтдылар.

Гьаманда йимик, генгешни гьасилин чыгъарып районну башчысы Магь­мут Амиралиев сёйледи ва ­оьзюню ойларын аян этди.

Демек, инг башлап, ДР-ни Башчысыны заманлыкъгъа борчларын кютеген С. Меликовну топуракъ гесеклени гьисабы ва шоланы инвентаризация этивю гьакъда берилген тапшурувларын оьз болжалында яшавгъа чыгъармагъа тарыкълыгъын ташдыргъан сонг, район администрацияны жаваплы къуллукъчуларына ва юртланы башчыларына шо ишни гьайында турмакъны тапшурду.

Олай да, районну гьакимбашы М.Амиралиев ДР-ни Халкъ Жыйынына топуракъ гесеклени бир категориядан оьзге категориягъа гёчюрмек учун хас кагъыз язмагъа таклиф этди. Шо масъаланы чечмек учун юртланы башчыларын да къуршалмагъа чакъырды.

Районну башчысы М. Амиралиев оьзюню сёйлевюн сув быргъыланы, резервуарланы, сувланы тазалайгъан къуралланы ва юртланы ген­планларыны масъалалары гьакъда оьзюню пикруларын айтгъан сонг, район администрацияны гезикли ­генгеши оьзюню ишин тамамлады.