Сюрюв ишлер
Заман нече де тез гете. Айтагъаным, 2022-нчи йылны ашлыгъыны тюшюмюн къайтарывгъа къуршалгъан авлакъларда ишлейген комбайнлени, оьзге тюрлю юрт хозяйство техниканы къулакъгъа чалынагъан авазлары яхшы тайып да битмеген, гёресиз, гелеген йылны тюшюмюню гьайын этме заман да етишип къалда.
Айтма тарыкъ, бу йыл авлакъчылыкъ тармакъны къуллукъчулары ашлыкълар болдурувда гёрмекли уьстюнлюклени къолда этме бажардылар.
2022-нчи йылны тюшюмю учун чачылгъан 14683 гектардагъы гюзлюк ва язлыкъ къылчыкълы ашлыкъланы гьар гектарындан 28,2 центнер тюшюм къайтарып беженлеге 41425 тон ашлыкъ тёкме бажардылар. Сугъарылмайгъан, къургъакъ топуракълардан шолай ашлыкъ къайтармакъ – уллу уьстюнлюк, деп гьисап этме ярай.
Къолда этилген уьстюнлюклер авлакъчыларыбызны, механизаторларыбызны янгы оьрлюклеге талпындыра, ерлерде 2023-нчю йылны тюшюмю учун гюзлюк ашлыкълар чачма топуракъланы гьазирлев, сюрюв ишлер оьзге йыллагъа къарагъанда эртерек башлангъаны гьис этиле.
Гётерилген ругь булан ишлейген авлакъчыларыбыз, механизаторлар гелеген йылны тюшюмю учун бу йыл гюзде 11-12 минг гектарлагъа гюзлюк къылчыкълы ашлыкълар чачма хыял бар.
Бизин якъларда янгурлар явмагъаны кёп бола. Топуракълар къатты, болса да механизаторлар сюрюв ишлени барышын гюн сайын чалтлашдыра, сюрюв ишлеге къуршалгъан техниканы санаву да артып юрюй.
Август ай яллавлу гетди. Механизаторлар гюнню исси вакътисинде техниканы токътатып, ахшамлар салкъында геч болгъунча сюрюв ишлени узаталар.
Топуракъланы сюрюв ишлер Гьели юрт мунципал къурулувда къурумлу кюйде юрюле. Гьели юртну жамияты, механизаторлары топуракъланы асывлу къоллавда оьзге юртланы ватандашларына уьлгю гёрсетегени биринчи йыл тюгюл.
Гюз чачывгъа гьазирлик гёрюв Губден юрт муниципал къурулувда да яман гёрюнмей. Къарабудагъгент, Къакъашура юртларда да сюрюв ишлер башлангъан. Амма Къакъашура юртну чачыв майданлары кёп, юртда техниканы масъаласы да ёкъ, амма сюрювню барышы юрекни рази этердей юрюлмей. Бу юртну топуракълары тав тюпде ерлешген, чакъгъа эрте салкъын тюше. Гюзлюклер топуракълар бузлагъынча чачылып, бир тегишден чыкъса, мол тюшюмлер къаравуллама боласан. Агротехника талапланы тюз юрютмекни гьайын этме тюше.
Мол тюшюмлер учун гьаракат этип айланагъан авлакъчыларыбызгъа, механизаторлагъа чачывну къайдаларын (севооборот) тюз юрютюп иш гёрюлсе, гьасиллер дагъы да яхшы, къуванчлы болур.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
