Тюшюмлер аслам гёрюне

Олгюн биз районну юрт хозяйство управлениесини ёлбашчысы Шагьабутдин Мустапаевден районда юрт хозяйство оьсюмлюклени тюшюмюн къайтарывну гюз чачывгъа гьазирлик гёрювню, барышы гьакъда маълуматлар алдыкъ. Ол оьзюню баянлыгъын районубузну экономикасына, гьар-тюрлю оьлчевдеги налогланы толувуна аслам къошум этеген юзюмчюлюк тармакъдагъы гьалдан башлады.

Гюнешни тюшюмю

къайтарыла

Юзюмчюлюк – бизин районда мердешли тармакъланы бири. Алдагъы заманлардан берли Къарабудагъгент районну юрт хозяйство предприятиелеринде кёп майданчаланы борла елеген ва юзюмню мол тюшюмлери болдурулагъан заманлар бизин гьали де эсибизден таймагъан. «Танг», «Манасгент», Уллубийавул совхозланы, Къурбукиде Ленинни атындагъы колхозну ишчилери, механизаторлары юзюм болдурувда къолда этген уьстюнлюклерин шо девюрде хозяйстволагъа гьукуматны янындан берилген савгъатлар, гёгювчю Къызыл байракълар уллу наслуну къайратлы загьматын исбатлай.

Гетген асруну 80-нчи йылларында ичкиликни алдын алабыз деп къабул этилген закондан сонг шонча къыйын тёгюп, харж чыгъарып оьсдюрген кёп майданлардагъы борла балтаны авзундан чыкъды…

Гьали ташланы янгыдан жыйма заман болгъан. Демек, юзюмчюлюк тармакъны янгыдан гётерме, юзюм болдурувну артдырма къаст салынгъан.

Артдагъы 10 йылны ичинде районда лап хайырлы тармакъланы бири юзюм бавланы майданларын генглешдиривде, юзюм болдурувну артдырывда йылдан-йыл яхшы натижалар къолда этиле геле.

Буссагьатгъы вакътиде районда 2111 гектар майданланы юзюм бавлар елеген. Шо участкаланы 1738 гектары планлы кюйде тюшюм береген юзюм бавлар.

2022-нчи йылда районну юзюмчюлери, механизаторлары тюшюм береген юзюмлюклерден 20193 тон гюнешни емишин жыйма ва сатывгъа чыгъарма, бир къадарын сакълавгъа салма, юзюм къабул этеген идаралагъа берме къаст булан чалышалар.

Районда бар юзюм тарлавланы авадан яны бираз геч бишеген «Молдова» журасы буса да, бир къадар топуракъларда эрте бишеген юзюмлер де ёкъ тюгюл.

Бугюнлерде фермерлер, топуракъда айрыча доланагъан ёлдашлар юзюмню эрте бишеген жураларын жыйып сатыв-алыв къурумлагъа, ишлетеген предприятиелеге берип туралар.

Буссагьатгъы вакътиге 151,5 гектар майданны тюшюмю жыйылгъан, 2080 тон гюнешни емиши алынгъан. Гектаргъа гьисап этгенде 137,3 центнер бола. Районда юзюмню эрте бишеген жураларыны тюшюмюн къайтарыв узатыла.

Ювукъ гюнлени ичинде районда юзюмню геч бишеген жураларыны тюшюмюн къайтарывну массовый кюйде башлама къаст бар.

Овошланы

тюшюмлери къайратыла

Бизин районда гьар йыл кёп майданлагъа ачыкъ топуракъгъа овош оьсюмлюклер чачыла. Муна, 2022-нчи йылны тюшюмю учун районну муниципал къурулувларында 433 гектар топуракъланы овош оьсюмлюклер елеген, 205 гектар – помидор.

Бугюнлерде овошланы тюшюмюн къайтарыв давам этиле. Гьалиге 158 гектар майдандагъы овошланы тюшюмю къайтарылгъан. 3105 тон овошлар жыйылгъан. Гьар гектар орта гьисапда 203 центнер тюшюм бере.

Ерлерде помидорну, къапустаны тюшюмюн къайтарыв узатыла. Самурсакъны, согъанны, чювюннюрню, моркопну, хыярны тюшюмю къайтарылып битген.

61 гектарда картюшке

Артдагъы йылларда районну муниципал къурулувларда, айрокъда тавтюп зонада ерлешген юртларда, адамланы экинчи ашы – картюшке чачывгъа агьамият берив арта геле. 2022-нчи йылны тюшюмю учун районда 61 гектар ерге картюшке чачылгъан. Авлакъланы тюшюмю къайтарылгъан ва 1202 тон картюшке алынгъан. Районну авлакъларында 2022-нчи йылны тюшюмю учун чачылгъан оьсюмлюклени тюшюмлерини ахырынчы тонналары къайтарыла.