Школалагъа тергев этди
Алдагъы гюнлерде, ачыкълашдырып айтсакъ, 29-нчу июльда ДР-ни маълумат ва печат агентлигини ёлбашчысы Абдуразакъ Жамалутдинов бизин районгъа иш сапар булан гелди ва бугюнлерде школаларда юрюлюп турагъан капитал ремонт ишлени барышына оьзюню тергевюн болдурду.
Артдагъы йылланы боюнда районубузну ичиндеги юртларда гьар тюрлю социал биналагъа ва объектлеге тергев бериле. Айтагъаным, школалагъа, яшлар бавларына, маданият ва савлукъ сакълав идаралагъа капитал ва оьзге ремонтлар этиле.
Ону шо сапарында районну администрациясыны орунбасары Жалалутдин Жамалутдинов ва яшавлукъ-коммунал хозяйство управлениени жаваплы къуллукъчулары узатдылар.
Шо гюн олар Уллубийавул, Паравул 2 ва Къурбуки 1 номерли орта школаларда болдулар. Эсгерилген школаларда юрюлеген капитал ремонтну барышында кёп миллион манат акъчалар гёрсетилип янгыртывлар ва онгарылывлар оьтгериле.
Оьрде атлары эсгерилген школаларда юрюлеген капитал ремонтгъа тергев этген сонг ДР-ни маълумат ва печат агентлигини ёлбашчысы Абдуразакъ Жамалутдинов жаваплы ёлдашлагъа ремонт ишлени чалтлашдырмагъа тапшурду. Олай да, ол оьзюню сёйлевюнде онгарылгъан ва янгыртылгъан класлагъа охувчу яшлар ва муаллимлер сентябр айны 1-нде гирмеге ва охувун башламагъа тарыкълыгъын ташдырды.
Олай да, оьзюню иш сапарында Абдуразакъ Жамалутдинов Къарабудагъгент районну башчысы Магьмут Амиралиев булан ону иш кабинетинде лакъыр этдилер.
Шо лакъырда ачыкъ болгъан кюйде, олар туризм тармакъны, денгизни боюнда ял алагъан майданчаланы, яйлыкъ каникулланы вакътисинде яшланы ял алыву, юрт хозяйство комплекс ва оьзге тармакъланы бизин районну территориясында оьсювюню гьакъында гьакълашыв этдилер.
ДР-ни маълумат ва печат агентлигини ёлбашчысы Абдуразакъ Жамалутдинов ва Къарабудагъгент районну башчысы Магьмут Амиралиев республиканы гьакимият къуруму ва муниципал район гележекде бир-бири булан тыгъыс аралыкълар тутажагъын ва агьамиятлы масъалаланы чечежегин бирдагъы керен аян этдилер.
Бугюнлерде районубузну ичиндеги уьч школагъа уллу капитал ремонтлар этилип тура. 2023-нчю йылда да шолай районну ичиндеги уьч школагъа капитал ремонт этилмеге гёз алгъа тутулгъан.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
