Аслу масъалалар тергевню тюбюнде

Сессияны барышында районну башчысы Магьмут Амиралиев ортакъчылыгъын болдурду. Ол, депутатлар аслу масъалалагъа гёчгюнче, залдагъылар булан саламлашып битген сонг, булай деди:

– Биз сизин булан ёлукъмагъаныбыз кёп бола, мен сизин районда этилеген ишлер булан таныш этме сюемен. Сиз буса гьар-тюрлю программалар булан районну ичинде этилип турагъан ишлени сайлавчуларыгъызгъа дурус етишдирме къаст этигиз.

Районну башчысы М.Амиралиев гьар тюрлю программалар булан районну муниципал къурулувларында этилип турагъан ишлени, гележекге алда дагъы да кёп ишлер этме гёз алгъа тутулгъанын уллу ругьланыв булан айтса да, муниципал къурулувларда тазалыкъны болдурувну, жыйылгъан нас-алагъожаны тайдыргъаны саялы гьагъын тёлевню танкъыт этди. Ерлерде тазалыкъны болдурувну гьайын этивде, огъар гьакъ тёлевню артдырмакъ учун район Жыйыныны депутатлары оьзлени округларында ватандашлар булан ёлукъма, тазалыкъны болдурмакъ учун гьагъын тёлевню яхшылашдырма гьаракат этме чакъырды.

Депутатланы район Жыйыныны 14-нчю сессиясын ону председатели Адил Салаватов ачды ва юрютдю.

Ол оьзюню гиришив сёзюнде сессияны гюнлюк иш низамын малим этди. Район Жыйыныны депутатлары 14-нчю сессияны гюнлюк низамын бир тавушдан тасдыкъ этген сонг, сессия оьзюню ишин башлады. Сессияда 9 масъала арагъа салынып къаралды. Шоланы арасында лап да аслусу районну яшавлукъ-коммунал хозяйствосуну объектлерини исси этив сезонгъа гьазирлик гёрювю эди.

Ватандашланы гюз-къыш айларда токгъа, газгъа бакъгъан талапларын яшавгъа чыгъармакъ учун ерлерде этилип турагъан ишлени барышын малим этме трибунагъа районну башчысыны 1-нчи орунбасары Ибрагьим Абдулмежитов чакъырылды.

Ол район Жыйыныны депутатларына 2022-2023-нчю йылланы гюз-къыш айларында раойнну яшавлукъ-коммунал хозяйствосуну объектлеринде юрюлюп турагъан ишлени ачыкъ этип айтды. И.Абдулмежитовну сёйлевюнден ачыкъ болгъаны йимик, 2022-2023-нчю йылланы гюз-къыш айларында районну яшавлукъ-коммунал хозяйствосуну ёрукълу ишлевюн болдурувгъа жаваплы хас комиссия къурулгъан.

– Ватандашланы, гюз-къыш айларда токгъа, газгъа, сувгъа бакъгъан талапларын кютювде де кёп четимликлер тувулуна. Гюз-къыш айларда юртланы бир-бир микрорайонларында токну гючю, газны басылыву осал бола. Бу ва булай оьзге тюрлю масъалаланы алдын алмакъ учун тийишли къурумлар булан бирликде хыйлы иш этилген ва бугюнлерде де шолай ишлер давам этилип тура, — деди ол.

И.Абдулмежитов оьзюню сёйлевюнде Гьели, Паравул, Уллубийавул юртланы халкъын гюз-къыш айларда газгъа бакъгъан талапларын яхшылашдырмакъ муратда назик диаметры булангъы быргъыланы орнуна базыкъ быргъылар къурашдырылгъанын, шкафлар алышынгъанын айтды.

Докладчы сессияда юртлуланы токгъа бакъгъан талапларын чече туруп, ерлерде РЭС-ни къуллукъчулары этген ишлени, йылны боюнда этме гёз алгъа тутгъан оьзге къуллукъланы да аян этип сёйледи.

Сессияда район Жыйыныны депутатлары 2021-нчи йылда район бюджетни кютюлювюню масъаласын да арагъа салып ойлашдылар. Район бюджетни 2021-нчи йылгъа кютюлювю гьакъда район администрацияны акъча ишлер управлениесини ёлбашчысы, Абакар Шагьманаев гьисап берип сёйледи.

Сессияда арагъа салынып къаралгъан масъалалагъа гёре тийиш­ ли къарарлар къабул этилди.