Муна, бирдагъы бир уьстюнлюк

Районну юрт хозяйство управлениесини баш агроному Магьамматшапи Абдулвагьабов бизге районда ашлыкъ къайтарыв компанияны гьасиллери гьакъда баянлыкъ бере туруп:

- Районда бу йылны тюшюмю учун умуми алгъанда 14683 гектар майданланы ашлыкъ тарлавлар елеген эди. Шону 10920 гектары къылчыкълы гюзлюк, 3763 гектары къылчыкълы язлыкъ ашлыкълар. Ерлерде ашлыкъланы тюшюмюн къайтарывгъа жаваплы янашып иш гёрюлдю. Районда бар ашлыкъланы тюшюмюн къайтарагъан техника эсги буса да, механизаторланы гьаракаты, касбу бажарывлулугъу булан ашлыкъланы тюшюмюн тас этивлеге тюшме къоймай къолгъа алма бажарылды.

Районда оьсдюрюлеген аш­лыкълар къургъакъ топуракълагъа чачылагъанны гьисапгъа алсакъ, натижалар къуванчлы. Демек, ашлыкъланы гьар гектарындан орта гьисапда 28,2 центнер тюшюм къайтарылгъан. Умуми алгъанда беженлеге 41425 тон ашлыкъ тёгюлген. Шо районубузну янгы тарихинде лап гёрмекли натижа – деди баш огроном.

Гертилей де, районубузну авлакъчыларыны, механизаторларыны, айры-айры фермерлерини къайратлы загьматы, гьаракаты макътавлагъа лайыкълы.

Топуракъланы асывлу къоллавгъа Гьели юрт муниципал къурулувда жаваплы янашалар. Гьар йыл Гьелиде 2 минг гектаргъа ювукъ топуракълагъа къылчыкълы ашлыкълар чачыла ва яхшы тюшюмлер де алына. Бу йыл да гьелили ашлыкъ оьсдюрювчюлени гьасиллери гёрмекли. Олар районда биринчилерден болуп ашлыкъ къайтарывну тамамладылар.

Къулакълардан авлакъларда ишлейген комбайнлени авазлары тайып битмеген. Гьелиде гелеген йылны тюшюмю учун топуракълар гьазирлев, сюрюв къурумлу юрюле.

2022-нчи йылда губденли, къурбукили ашлыкъ оьсдюрювчюлени гьасиллери де юрек рази къалардай.

Районда ашлыкъ къайтарыв уьстюнлю кюйде тамамланып, гьасиллер къуванчлы буса да ол къолда этилген уьстюнлюк.

Алда буса 2023-нчю йылны тюшюмюню гьайын эте туруп ашлыгъы къайтарылгъан тарлавланы саламын жыйывну, топуракъланы сюрювню гьайын этме тюше.