Уьстюнлюклерибиз арта

М А Ъ Л У М А Т:

Умаракъаев Завур Абдулбекович 1977-нчи йылда Магьачкъалада тувгъан. Ол Къарабудагъгент 2 номерли орта школаны тамамлагъан сонг, 1999-нчу йылда ДГПУ-ну физкультура ва спорт факультетин битдирген. Оьзюню загьмат ёлун ол 2002-нчи йылда Къарабудагъгент ДЮСШ-де тутушуп ябушувдан тренер болуп башлагъан. 2016-нчы йылдан берли Къарабудагъгент район администрацияны физкультура ва спорт бёлюгюню ёлбашчысыны къуллугъунда ишлей. Ол уьягьлюсю булан бирче 4 авлетни тарбиялай ва оьсдюре.

Завур Умаракъаев яшёрюмлени арасында 1996-нчы йылда Дагъыстанны первенствосунда 60 кило авурлукъда 2-нчи ерни алгъан. Олай да, ол 2004-нчю йылда 58 кило авурлукъда Дагъыстанны тутушуп ябушувдан первенствосунда 1-нчи ерге ес болгъан. Завур Умаракъаевни гьаракаты булан Дагъыстанны, Россияны чемпионлары ва призёрлары тарбиялангъан. Олай да, ол Европаны первенствосуну – 6 ва дюньяны первенствосуну 4 алдынлысына спорт чалышывунда ёл ачгъан.

– Завур Абдулбекович, районда спорт тармакъгъа къуршалгъан идараланы ва касбучуланы гьакъында баянлыкълар бермекни арив гёребиз.

– Мен ёлбашчылыкъ этеген районну физкультура ва спорт бёлюгюнде 4 адам ишлейбиз. Олай да, районда бар ДЮСШ-де 130 тренер-дарс беривчю иш гёре. Райондагъы спорт школаларда 3500-ге ювукъ яш ва яшёрюм спортну тюрлю-тюрлю жураларында машгъул болуп туралар. Аслу гьалда бизин яшларыбыз бокс, тутушуп ябушув, кикбоксинг, ушу-саньда, волейбол, боскетбол, футбол, самбо, авур атлетика ва оьзге тюрлю спортну жураларыны бёлюклерине юрюй.

– Завур Абдулбекович, спортну масса къайдада юрютмек учун не йимик чаралар гёрюле?

– Оьтген 2021-нчи йылны узагъында бизин районбузда спортну 16 журасындан 28 спорт масса ярышлар оьтгерилген. Шо ярышларда 5 мингден къолай адам ортакъчылыгъын болдургъан. Коронавирус аврув себепли болуп, ортакъчылыкъ этегенлени санаву бир хыйлы аз болду.

Спорт масса ишлени гьакъында мекенлешдирип айтайыкъ. Масала, 350 гиччи яшлар ва яшёрюмлер ортакъчылкъ этип тутушуп ябушувдан районну первен­ст­восу оьтгерилди. РФ-ни Игити Магьамматшамил Абдурагьимовну эсделигине яшёрюмлени арасында ушу-саньдадан районну ачыкъ первенствосу болду. Шонда 120 яшёрюм ортакъчылыкъ этди.

Сакъатланы арасында районну спартакиадасы ­оьтгерилди. Шонда буса 30 сакъат оьзлени ортакъчылыгъын болдурду. 60 гиччи улан яшланы ва къызъяшланы ортакъчылыкъ этивю булан настольный теннис­ден районну первенствосу оьтгерилди.

Дагъы да, 480 яш ортакъчылыкъ этип футболдан районну тунири болду. Олай да, уллуланы арасында волейболдан турнир оьтгерилди. Шонда 120 адам ортакъчылкъ этди.

Футболдан буса Къарабудагъгент, Дёргели, Паравул, Гьели, Манасгент, Манас ва Къурбуки юртланы чемпионатлары оьтгерилди. Шоларда 940-дан къолай футболчу ойнадылар. Оьтген йылны барышында 370 адам ГТО-ну нормаларын толтурду, шоланы 120-сы – алтын белги алдылар.

Бизин районну футбол командасы юрт командаланы арасында оьтгерилген Бютюнроссия ярышларда 2-нчи ерни къазандылар. «Золотой колосок» деген ярышда буса 1-нчи ерге ес болду.

Боксдан ва тутушуп ябушувдан бизин яшларыбыз яхшы натижалагъа етишген. Демек, боксдан РФ-ни жыйым командасына 3 яшыбыз ва тутушуп ябушувдан – 1 яшыбыз къошулгъан. Артдагъы 3 йылны ичинде самбо, футбол, рукапашный бой журалардан 1-нчи ерлеге ес болуп тура.

– «Спорт – яшавну нормасы» деген хас программагъа гёре районда не йимик ишлер кютюле?

– «Спорт – яшавну нормасы» деген хас программагъа гёре артдагъы вакътини ичинде Къарабудагъгент, Гьели, Паравул ва Къакъашура юртларда 4 воркаут майданча къурашдырылгъан. Къарабудагъгентде – 3, Уллубийавул, Аданакъ, Гьели, Агъачавул, Къакъашура ва Манасгент юртларда бирер футбол майданчалар ачыл­гъан. Оланы оьлчевлери: 40 метр – узунлугъу, 20 метр – генглиги.

Алдынлы ерлеге ес болгъан спортчуларыбызгъа ва оланы уьйретген тренерлерибизге район администрацияны янындан премиялар ва савгъатлар тапшурулагъаны яхшы мердешге айлангъан. Шоллукъда, даимли кюйде физкультура ва спорт булан бизин районубузда 51 процент адам машгъул бола. Шо буса, адамны савлугъун беклешдиривюне болушлукъ этегени ачыкъ.

– Завур Абдулбекович, артдагъы йылны ичинде бизин спортчуларыбыз етишген уьстюнлюклери ва оьрлюклери булан ювукъдан таныш этсегиз.

– Шо гьакъда мекенли кюйде маълуматлар берейим. Гьар тюрлю даражаларда ва спортну жураларында оьтгерилген ярышларда бизин районлу 1992 спортчу ортакъчылыкъ этген. Шоланы 1115 – алдынлы ерлеге ес болгъан. Олай да, бизин 411 спортчубуз 1-нчи ерлени къазангъан.

Районну даражасында оьтгерилеген первенстволарда ва чемпионатларда 197 спортчубуз 1-нчи ерлени къазангъан. Республика турнирлерде 66 спортчубуз – 1-нчи, 61 – 2-нчи ва 63 спортчубуз буса 3-нчю ерлеге ес болгъан. Бютюнроссия турнирлерде 1-нчи ерлени 40 яшыбыз алгъан. Олай да, 35 спортчубуз – 2-нчи ва 22 спортчубуз 3-нчю ерлени къазангъан. ДР-ни чемпионатларында ва первенстволарында 27 яш – 1-нчи, 12 – 2-нчи, ва 36 яш 3-нчю ерлени къазангъанлар. ДР-ни зонасында 1-нчи ерни – 18, 2-нчи – 13 ва 12 3-нчи ерни 13 спортчубуз къазангъанлар. СКФО-ну первенстволарында ва чемпионатларында 25 спортчубуз – 1-нчи, 12 – 2-нчи ва 3-нчю ерлеге ес болгъан. Олай да, Россияны пенрвенстволарында ва чемпионатларында 27 спортчубуз 1-нчи ерлеге ес болгъан, 10 спортчубуз – 2-нчи ва 8 спортчубуз 3-нчю ерлени къазанмагъа бажаргъан.

Шолар булан янаша футболдан оьтгерилеген Дагъыстанны чемпионатында «Олимп» командабыз яхшы оюнлар гёрсетип тура. Сонг да, ДР-ни ЛФЛ ва НФЛ лигаларында 10 футбол командабыз ортакъчылыкъ эте. Олай да, школаланы арасында оьтгерилген первен­ствода гимназияны командасы 3-нчю ерге ес болду. Авур атлетикадан ва ушу-саньдадан бизин яшёрюмлерибиз 1-нчи ерлени къазангъанында оьктем кюйде айтаман.

Шолар буса – нечакъы яхшы натижалар да ва уьстюнлюклер.

– Материал-техника базаны гьалы нечикдир? Олай да, сиптечилерден кёмеклер бармы?

– Спорт булан машгъул болмакъ учун райондагъы яшлагъа ва уллулагъа 119 спорт идара бар. Шоланы ичинде 2 стадион, 15 футбол майданчалар, 31 спорт заллар, 28 мини-футбол майданчалар, 4 баскетбол майданча, 12 волейбол майданча, 27 воркаут майданча ва 10 ясандырылгъан спорт­заллар бар.

Районну ичинде ва тыш янда оьтгерилеген ярышларыбызгъа, озокъда, районну башчысы Магьмут Амиралиевни кёп уллу кёмеги тие. Ону булан янаша районну ичиндеги бары да юртларда сиптечилер, спортчуланы ата-аналары оьзлерден болагъан кёмегин этелер. Олагъа барысына да баракалла билдирмеге сюемен.

Физкультурникни гюнюню алдында районну ичиндеги бары да тренерлени, спортчуланы ва спорт тармакъда чалышагъанланы шо байрам булан къутлайман, къаркъарасына къатты савлукъ, ожагъына берекет ва ярышларда даим уьстюнлюклер ёрайман.