Пагьмулу адам

Мен гьали оьзюню гьакъында хабарлама сюеген шаир Вагьабова Азинат Бийболатовна. Мен оьзюм школада охуйгъандан берли ол Къакъашура 2 номерли орта школаны китапханасыны ёлбашчысы болуп ишлей эди. Азинат Вагьабова бек пагьмулу, саламат сёзлю, ачыкъ келпетли, уьлгюлю адам. Ону терен маъналы, адамны ругьландырагъан шиърулары охувчуланы сюювюн тарта. Ата юртуна багъышлангъан «Къакъашурам аявлу» деген шиърусуну сатырларын эсгермеге сюемен.

Шулай оьзюню юртуна бакъгъан сюювю, Азинатны юрегинде буссагьатда да кемимеген.

Сонг да Азинат Вагьабова оьзюню шиъруларында яшларына бакъгъан сюювюн де суратлай, оланы къайгъылардан арек сакълама сюегенин англата. Шолай шиъруларыны бириси – «Азрейилден тилеймен».

Озокъда, адам дюньяда бир керен яшай. Шо саялы мекенли ойлашып, халкъына пайдалы болуп яшамагъа герек. Шолай Азинат Вагьабова да оьзюнден болагъан гьаракатны эте.

Азинат Вагьабова 1950-нчи йыл апрель айны 26-нда Къарабудагъгент районну Къакъашура юртунда Бийболат ва Шаитханум Вагьабовланы агьлюсюнде тувгъан.

Азинат Вагьабова Къакъашура орта школаны битдирген сонг, Магьачкъала шагьардагъы Дагъыстан политехника техникумгъа охума тюше. Охувун тамамлагъан сонг ол Магьачкъаладагъы консерво заводда мастер болуп ишлей.

1980-нчи йылда ол агьлюсю булан бирче ата юртуна къайта ва Къакъашурадагъы орта школаны китапханасында ишлей.

1989-нчу йылда Къакъашурада 2-номерли орта школа ачыла. Янгы школада Азинат Вагьабова китапхананы ёлбашчысы болуп иш башлай ва бугюнлеге ерли ишлеп де тура.

Азинат Вагьабова гиччиден берли шаирликге иштагьлангъан, кеп керенлер шиърулар язма урунгъан. Оьзюню шиъруларын ол школада оьтгерилеген чараларда яшлагъа охута.

Азинат оьзюню биринчи шиърусун Совет Союзну игити Валентина Терешковагъа багъышлагъан.

Ону кёп шиърулары «Ёлдаш» ва «Районну яшаву» газетлерде чыкъгъан,

«Къарчыгъа» журналда яшлар учун чыкъгъан шиърулары да бар.

Школаны охувчулары район ва республика даражада оьтгерилеген конкурс­ларда Азинат Вагьабованы шиъруларын охуп призовой ерлеге ес болгъанлар.

Азинат Вагьабова ДР-ни китапханачыларыны адабият конкурсунда ортакъчылыкъ этген ва 1-нчи ерге ес болгъан.

Сонг да, Азинат Вагьабова халкъы учун жанын къурбан этген Уллу Ватан давну ортакъчысы Гьажи Биймирзаевге багъышлангъан республика оьлчевде оьтгерилген чарада актив кюйде ортакъчылыкъ этген ва грамота булан савгъатлангъан.

А. Вагьабованы шиъруларына белгили шаир, публицист ва таржумачы Бадрутдин Магьамматов бек арив сесленив язгъан. Бизин Азинатны шиърулары ДР-ни Милли китапханасы чыгъаргъан поэзия ва проза китапланы жыйымына да гирген.

Азинат Вагьабованы «Яшавну толкъунлары» деген 1-нчи китабы 2013-нчю йылда чыкъгъан. Сонг да, «Топуракъ тилей» деген 2-нчи китабы да чыкъмагъа гьазир болуп тура.

Мен оьз янымдан Азинат Вагьабовагъа савлукъ ва оьмюр ёрайман. Юртлулары оьзю булан оьктем болагъанны айтмагъа сюемен.

Жамал Дорушев, Къакъашура юрт