Гёз аврувланы гьайында

Шогъар байлавлу болуп, август айны 8-нде Къарабудагъгент ЦРБ-ни поликлиникасында офтальмолог доктор Сайгидат Гьажиева булан ёлугъув оьтгерилди. Шо ёлугъувда больницаны къуллукъчулары булан район администрацияны маданият ва туризм бёлюгюню ёлбашчысы Найида Мурзаева ва баш китапханачы Азинат Пашаева ортакъчылыкъ этдилер.

«Гёз аврувлагъа къарайгъан касбучуланы оьзлени байрамы булан къутлай туруп, олагъа савлукъ, иш уьстюнде оьрлюклер ва агьлю насип ёрайбыз. Дюньяны гёзеллигин сезеген ва гьис этеген адамны гёзлери. Шо гёзлени гьайын этеген докторлагъа гьар даим макътав тийишли»,-деди Н.Мурзаева оьзюню сёйлевюнде.

«8-нчи августда Халкъара офтальмологияны (гёз аврув) гюню 2004-нчю йылдан берли оьтгериле. Демек, шо гюн белгили гёз аврув доктор Святослав Фёдоров тувгъан. Адамны гёзлерини гёрегени осал болса, шо ону учун нечакъы да авур иш. Шо аврувланы гьайын болдурагъан касбучулагъа адамлар абур ва гьюрмет этмеге герек»,- деп эсгерди оьзюню сёйлевюнде А.Пашаева.

Гёз аврувлагъа къарайгъан доктор Сайгидат Гьажиева гёзлери аврумасын учун не йимик чаралар ва упражнениелер этмеге тарыкълыгъы гьакъда маълуматлар берди. Ону сёзлерине гёре, гёзню нечакъы бола буса да адам аявлап сакъламагъа ва ону гьайын этмеге герек. Шо саялы да, адамны ишлейген ери тарыкъ чакъы ярыкъ булан таъмин болмагъа тарыкъ. Компьютерлер булан ишлейгенлер гёзлерини савлугъуну гьайын этмеге тарыкъ. Демек, олагъа ишни арасында танапуслар (перерыв) этмеге ва ял алмагъа тюше.

Къарабудагъгент ЦРБ-ни поликлиникасыны ёлбашчысы Гюлженнет Расулова офтальмолог докторланы оьзлени касбу байрамы булан къутлады, гелген къонакълагъа ва районну халкъына савлукъ ва насип ёрады.