Агьамиятлы масъалалар тергевню тюбюнде

Чараны гиришив сёз булан районну башчысы Магьмут Амиралиев ачды ва юрютдю. Ол залдагъылар булан саламлашып битген сонг, олгюнлерде республиканы Башчысы Сергей Меликов республиканы яшавлукъ коммунал хозяйствосуну 2022-2023-нчю йылларда гюз-къыш айларына гьазирлик гёрюв, школаланы, яшлар бавларына тарыкълы ремонтларын заманында тамамлама, янгы охув йылгъа тындырыкъ кюйде гьазирлик гёрме тарыгъын тапшурагъанын малим этди.

– Биз де бу агьамиятлы масъалагъа жаваплы янашма, районну яшавлукъ коммунал хозяйствосун 2022-2023-нчю йылланы гюз-къыш айларында тюзевлю ишлевюн болдурма, ватандашланы гюз-къыш айларда газгъа, токгъа, ичеген сувгъа бакъгъан талапларын толу кюйде чечмекни гьайын этме тарыкъбыз, — деди районну башчысы ва трибунагъа районну башчысыны 1-нчи орунбасары Ибрагьим Абдулмежитовну чакъырды.

Ол оьзюню сёйлевюнде районну ЖКХ-ны ва капитал къурулуш объектлерин 2022-2023-нчю йылланы гюз-къыш айларына гьазирлик гёрювню барышына район штаб оьзюню тергевюн болдурагъанын аянлашдырды. Докладчы эсгереген кюйде, 31 кёп уьйлюк биналагъа 2022-2023-нчю йылланы исси этив сезонгъа гьазирлик паспортлар заманында алынажагъын ташдырды, исси этив сезонгъа гьазирлик гёрювде оьзге йыллар йиберилген кемчиликлер гьисапгъа алынгъанын ачыкълашдырды.

И.Абдулмежитовну сёйлевюнден ачыкъ болгъаны йимик, гюз-къыш айларда адамланы ожакъларында таман даражада быргъыларда газны басылыву, ток теллерде напряжение, кранларда ичеген таза сув болсун учун районну башчысы М.Амиралиевни гьаракаты, чабып айланышы булан кёп иш этилгенин, гележекде де дагъы да кёп ишлер этме, оьрде эсгерилип гетген масъалаланы бютюнлей яшавгъа чыгъармакъ учун оьрде токътагъан къурумлар булан тыгъыс байлавлукъда ишлер юрюлегенин айтды.

Халкъланы газгъа бакъгъан талапларын яхшылашдырмакъ муратда газ быргъыланы реконструкция этив, шкафланы онгарыв ишлер узатыла. Демек, 66,348 километр мезгилдеги газ быргъы, 21 шкаф алышдырылгъан. Уллубийавулда 100 мм базыкъ­лыгъы булангъы 120 метр мезгил­ге 219 мм базыкълыгъы булангъы быргъы къурашдырылгъан. Шолай ишлер Паравул, Гьели юртларда да оьтгерилген. Гёрюлген чараланы натижасында эки де юртдагъы газ быргъыларда газны басылыву бир къадар артгъан. Эсгерме тарыкъ, районда догазификация деген федерал программа иш гёре. Шо да районну юртларын газлашдырывгъа болушлукъ этежегин эсгерди.

Докладчы оьзюню сёйлевюнде гюз-къыш айларда объектлени, ватандашланы токгъа бакгъан талапларын яшавгъа чыгъара туруп, районда ток теллени напряжениесин къолайлашдырмакъ, гюз-къыш айларда къыставуллу гьал болуп къалмасын учун РЭС-ни коллективи бузукъ агъач багъаналаны орнуна темир-бетон къатыш багъаналар, фидерлер ва оьзге тарыкълы ишлер этив юрюлюп тура.

И.Абдулмежитовну сёйлевюнден ачыкъ болгъаны йимик, буссагьатгъы вакътиде 234 багъана бары да тарыкълы алатлары булан алышынгъан. Ток теллерде токну напряжениесин артдырмакъ муратда АС-35 телни ерине 4 тон АС-50 телге алышдырылгъан.

Гюз-къыш айларда Манас зонада ток теллени напряжениеси бек осал болагъаны ачыкъ. Докладчы оьзюню сёйлевюнде бу зонада токну масъаласын ёрукълу чечмек учун ПАО «Россети Северный Кавказ» -«Дагэнерго» бизин районда оьтгерилип турагъан ишлени малим этди.

Чарада районну электрохозяй­ствосуну жаваплы къуллукъчусу Завур Гьайдаров ортакъчылыкъ этди ва оьзюню къысгъаракъ сёйлевюнде докладчы районда токну масъаласын тайдырмакъ учун РЭС-ни коллективи этген ишлени ва гележекде этме гёз алгъа тутгъанларын да И.Абдулмежитов янгылышмай эсгерди. Шо коллектив районну яшавлукъ-коммунал хозяйствосуну объектлерин, ватандашланы 2022-2023-нчю йылланы гюз-къыш айларында токгъа бакъгъан талапларын чечмек учун бары да гюч бакъдырылагъанын ачыкълашдырды.

Жыйында районну охув ожакълары, яшлар бавлары гюз-къыш айлагъа гьазирлик гёрювдеги гьалны гьакъында районну башчысыны орунбасары Жалалитдин Жамалитдинов маълумат берди. Ону сёйлевюнден ачыкъ болгъаны йимик, районну охув ожакъларында янгы охув йылгъа гьазирлик гёрюв низамлы кюйде узатыла ва юрюле. Школаланы коллективлери тамларына акъ чабып, класланы, парталаны тазалав, территорияланы айланансын безендирив ишлер узатылагъанын ачыкълашдырды.

Чарада районну газ абонент къуллугъуну ёлбашчысыны заманлыкъгъа борчларын кютеген Завур Сахаватов ортакъчылыкъ этди ва чыгъып сёйледи. Къоллагъан газгъа гьакъ тёлев районда чечип болмас йимик тююн болуп токътагъан. Артдагъы бир нече йылны ичинде къурумда 8-9 ёлбашчы алышынгъан.

Къарагъанда, олар масъаланы тюз чечме, къоллагъан газгъа гьакъ жыйывну яхшылашдырма къарамагъан. Районну газгъа 2 миллиард манатдан къолай борчу бар. Шо тюз санав тюгюл деп гьисап этемен. Районда 14400 абонент бар. Газгъа бирев де гьакъ тёлемей деп айтма болмайман. Шо ишни дагъы да яхшылашдырма тарыкъ. Завур Сахаватов районну газгъа борчун мекенлешдирмек, ФИАС-ни ишде бар тетиклени тайдырмакъ учун районну башчысындан кёмек, якълав къаравуллайгъанын ­ачыкълашдырды.

Районну башчысы М.Амиралиев жыйында арагъа салынып къаралгъан масъалагъа гёре гьасил чыгъарып сёйледи, администрацияны жаваплы къуллукъчуларына, юртланы башчыларына тапшурувлар берди.