Татавуллар тазалана
Юрт хозяйство производствону асувлулугъун гётеривде, участкаланы гелимлигин артдырывда сугъарыв сувну агьамияты уллу. Шо саялы тийишли къурумлар сув къоллавчуланы тайышывсуз кюйде сугъарыв сувланы юрт хозяйство продукталар болдурувчулагъа етишдирмекни гьайын этме гереклер.
Сугъарыв сувланы авлакълагъа чыгъарывда, ёл бойларда сувланы тас болувларыны алдын алывда аслу сув татавулланы, ич хозяйство татавулланы тазалыгъындан, онгарылгъанындан да кёп зат гьасил бола.
Бизин район сугъарыв сув булан лап къыт районланы бири. Шо саялы да сугъарыв сувланы аяп къолламакъны гьайын этме тюше.
Бугюнлер авлакъларда юзюм бавланы, бахча, овош тарлавланы сугъарыв ишлер къурумлу кюйде узатылып тура.
Айтма тарыкъ, бу йыл районну оьзенлеринде яхшы сув бар.
ДР-ни ФГБУ-ну «Минмелиоводхозуну» бизин райондагъы филиалыны коллективи де бар сувланы сув къоллавчулагъа етишдирмек учун оьзлени къолундан гелеген гьаракатны этелер.
Бугюнлерде сув къоллавчуланы талапларын яшавгъа чыгъара туруп, Р-18 каналны бир хыйлы мезгили арив тазалангъан. Буссагьат Гьамзат Гьамзатовну атындагъы баш татавул тазаланып тура. Бу ишлер оьтгерилгенде сув къоллавчуланы сувгъа бакъгъан талапларыны масъаласы яхшылашгъан. Айтагъаныкъ, авлакълагъа чыгъагъан сувланы къадары артгъаны гьис этиле.
Татавулланы тазалавда УОС-ну уьюрлери: бёлюкню ёлбашчысы И.Гьалимов, татавуллагъа къаравчулар А.Муталимов, М.Балашев ёлдашлар тергев этип тургъан.
Оьз янындан сув къоллавчулар да къоллагъан, сугъаргъан участкасына гьагъын тёлеме тюше. Шо кёп харж тюгюл. Сувгъа гьагъын тёлесегиз, сув талап этме боларсыз.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
