Гьасиллерден къуванма ярай
Оьзге ерлерде йимик бизин районда да гюзлюк ва язлыкъ къылчыкълы ашлыкъланы тюшюмюн къайтарыв узатыла. Районда артдагъы йылларда кёп майданлар ашлыкълар булан ишлетиле барагъаны кимни де сююндюрмей болмай. Бу йылны тюшюмю учун 14897 гектар майданланы къылчыкълы гюзлюк ва язлыкъ ашлыкълар бийлеген. Районда ашлыкъ къайтарыв къурумлу кюйде башланды ва бир тюрлю четимликлени гьисапгъа алмагъанда, ашлыкъ къайтарыв къурумлу кюйде юрюле.
Буссагьатгъы вакътиде районну муниципал къурулувларында ашлыкъланы тюшюмюн къайтарыв экватордан оьтген, бир-бир муниципал къурулувларда гюзлюклени ахырынчы гектарларыны ашлыгъы къайтарылып тура. Шолай муниципал къурулув – Гьели гьисаплана.
Районда ашлыкъланы тюшюмюн къайтарывгъа байлавлу, районну юрт хозяйство управлениесини баш агроному Магьамматшапи Абдулвагьабовдан маълумат алдыкъ. Ол булай деди:
– Буссагьатгъы вакътиде районда къылчыкълы ашлыкъланы тюшюмюн къайтарывну барышы гюн сайын чалтлаша юрюй.
Бугюнге районну муниципал къурулувларында ерлешдирилген къылчыкълы гюзлюк, язлыкъ ашлыкъланы 11431 гектаргъа ювугъуну тюшюмю къайтарылып битген.
– Гьасиллени гьакъында не айтма боласан?
– Гьасиллерден къуванма ярай. Буссагьатгъы вакътиге орулгъан гюзлюк къылчыкълы ашлыкъланы гьар гектары – 28 центнер, къылчыкълы язлыкъ ашлыкълар гектаргъа гьисап этген 23 центнер тюшюм бере. Бизин къылчыкълы гюзлюк ва язлыкъ ашлыкъларыбыз сугъарылмайгъан топуракъларда ерлешдирилгенни гьисапгъа алсакъ, натижалар яман тюгюл деп ташдырма болабыз. Къалгъан участкаланы тюшюмю дагъы да яхшы болма герек. Айры-айры муниципал къурулувларда гектардан 30 центнерден къолай тюшюм къайтарагъан ёлдашлар да бар,- деди Магьамматшапи Абдулвагьабов.
Гертилей де, районда ашлыкъ къайтарывну тас этивсюз уьстюнлю кюйде тамамламакъ учун гьаракат, загьмат тёгюв гючлю. Амма ашлыкъ къайтарывгъа къуршалгъан техника эсги, иш уьстде кёп бузула, шо себепден тас болувлагъа ёл ачылагъаны гьакъ.
Районда ашлыгъы къайтарылгъан тарлавланы саламын тайлагъа къысыв, ташыв ишлер де давам этиле.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.