Меню
16+

Сетевое издание "Району яшаву"  «Будни района»

22.07.2022 09:46 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Тазалыкъ болдурайыкъ!

Гьалиги заман тазалыкъны сюймейген, уьйлеринде болдурмайгъан адам ёкъдур. Гьар адамны уьюнде дегенлей агъып гелеген булагъы ва башгъа онгайлыкъ­лары бар. Шогъар гёре, кимге къарасанг да, уью-ожагъы таза, арив онгарылгъан… Шо – нечакъы да яхшы.

Тек Къарабудагъгент юртубузну орамларыны гьалы бизин сююндюрмей. Къайсы орамгъа къарасанг да, шоланы «безеген» гьайванланы наслары юрекни буза. Юртда да, районда да тазалыкъ болдурув гьакъда кёп сёйлене, тек сёзге гёре иш этилеми?! Билмеймен, гёрюнмей.

Неге десегиз, саякъ гьайванланы гьакъында кёп керенлер айтылгъан, этилежек ишлер гёз алгъа тутулгъан. Тек не этерсен, этилеген иш шону булан битип къала. Кёп керенлер айтылынгъан: «Саякъ гьайванланы есилерине къоду салынажакъ, такъсыргъа тартылажакъ» деген сёзлер «сёз» кюйде къалса тюгюл, дагъы этилеген иш гьис этилмей. Гьар группаларда, адамлар жыйылагъан ерлерде халкъны саякъ гьайванлары гьакъда этилеген кантланы эшитгенде, адамны ичибушмай болмай. «Гьар гюн эртенокъ чыгъып саякъ гьайванланы погъун-насын жыйып, жувуп гирсек, бираздан къайтып, шо гьалда бола. Не этсек де, къабакъалларыбызны таза сакълап болмайбыз.

Гюнде нече керен халкъны гьайванларыны къабакъалдагъы насын жыяйыкъ?!

Нече де уялмайгъан адамлар да бар. Сютюн , этин оьзлер ашай, бизге насын жыйдыра. Гьайван айтгъанны англамайгъанны, къарсалагъанны-урушгъанны билмейгенни англасакъ да, бир-бирлерде олагъа да гьалек болабыз. Есилерин де билмейбиз, кимники буса да, бизин учун сакълайму буланы?!» — деп ассилене олар.

Гертилей де, юртну орамларындагъы саякъ гьайванлагъа къаршы не иш юрюле? Олагъа къаршы бир чара оьтгерилмесе, юрт таза болажакъмы? Озокъда, болмажакъ!

Юрт ерде гьайванлар сакъламай болмай, нечакъы да сакъласын. Тек заралын халкъгъа тийдирмек – арив иш тюгюлюн де анг­лама тюше. Бизин юртубузну тазалыгъыны гьайын биз этсек тюгюл, бирев де этмежек. Гьар юртлу адам ­оьзюню къолундан гелеген тазалыкъ­ны этип, юртубузну гёзеллигин болдурма тарыкъ. Гележекде яшларыбыз нас­лыкъгъа уьйренип, айланагъа тергевсюз къалардан къоркъаман. Неге тюгюл тазалыкъгъа олар гиччиден тутуп, уллулардан, демек, бизден уьйрене.

Бир-бир адамлар ёл ягъадагъы абзар-бавларындагъы нас-алагъожаланы, терек-бутакъланы да бавундан чыгъарып ёл ягъагъа ташлап къоя, къабакъалын сибирип, чёпню оьзлени ягъындан бираз ари теберип, уьюне гире.

Демек, оьзлени тувра алды таза буса, къалгъан якъ нас болса да ярай...

Бирлер буса, сибирип-жыйып айланасын тап-таза этип, чёпню де ташлап, сувлар да себе. Шолайлагъа къарап сукъланасан…

Бирдагъы керен саякъ гьайванланы масъаласын эсгере туруп, шо гьайванлагъа къаршы юртда не иш гёрюлген, шону гьайын ким эте. Юрт агьлюлер къайсы нече гьайван сакълай, нечик сакълай, гьар гече олар кимлени къапу алдында ята ва…

Шо гьакъда гьайван есилер де ойлашма ­тарыкъ!

Белгили кюйде, таза­лыкъ – савлукъну башы. Наслыкъ савлукъгъа чалтакъ салагъанны да биле туруп, къачан болгъунча масъалалагъа гёз юмуп туражакъбыз?! Биринчилей, юртубузда тазалыкъны гьайы этилме герек. Шо иш жаваплы адамлагъа тапшурулуп, этген иши гьакъда олар юртлулагъа гьисап берсе, гюнагьлылар (орамлагъа чёпню тёгегенлер) такъсырланса, саякъ гьайванланы есилерине къоду салынса, тазалыкъны масъаласы чечилмесмикен?!

Юртлулар барысы да, гьар адам уьюндегилерден башлап, ишлейген ерлеринде, авул-хоншу арада, орамларда масъаланы гётерип, ­оьзлер уьлгю болуп, тазалыкъ­ны болдурмагъа герек.

«Юртубуз бары да юртлардан таза болмагъа герек»,-деген мурат булан иш тутмагъа юртлуланы чакъыраман.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

0