Ремонт ишлеге тергев
Алдагъы гюнлерде, ачыкълашдырып айтгъанда, 18-нчи июльда, Къарабудагъгент районну башчысы Магьмут Амиралиев Уллубийавул юртгъа сапар чыкъды. Оьзюню сапарында ону «Архитектура ва къурулуш тергев управление» МКУ-ну ёлбашчысы Имангьюсен Шихаев ва районну администрациясыны прес-къуллугъуну ёлбашчысы Багьавутдин Самадов узатдылар. Шо иш сапарында районну гьакимбашы М.Амиралиев Уллубийавул орта школада бугюнлерде юрюлюп турагъан капитал ремонтгъа тергевюн болдурду.
Школаны майданчасында оланы Уллубийавул юртну администрациясыны башчысы Руслан Абуев, Уллубийавул орта школаны директору Муъминат Умаева ва капитал ремонт ишлени юрютеген къурулуш идараны вакиллери къаршыладылар.
Эсгерилген ёлдашлар булан бирче Магьмут Амиралиев школаны уьч де къабатында айланды ва оьзюню тергевюн болдурду. Олай да, олар школаны спортзалында ва ашханасында юрюлеген ишлени барышына да къарадылар.
Эки-уьч жумалар алда районну башчысы М.Амиралиев Уллубийавул орта школаны капитал ремонтуна тергев этген эди. Шо заман ол ремонт ишлени юрюшюне рази тюгюллюгюн, осал юрюлегенин айтгъан эди. Шо саялы болма ярай, артдагъы гюнлени ичинде школада юрюлеген ишлер жанлангъан ва яхшы кюйде оьтгерилип тура.
Ачыкълашдырып айтсакъ, кафель тутагъан усталар школаны канзилерине янгы кафель салып, ярыкъ болдурагъанлар ток теллени ва оьзге тюрлю къуралланы къурашдырып, класланы тамларын ва спортзалны пурхасын штукатур этеген усталар шо ишлерин мукъаятлы кюйде юрютюп туралар.
– Капитал ремонт оьтгереген къурулуш бирлешивню ёлбашчыларына гёрсетилген ишлени оьз болжалында тамамламакъ учун дагъы да иш гюч къуршамагъа чакъыраман. Школаны ичиндеги бары да ишлер август айны 15-и болгъунчагъа битмеге ва хас акт булан тапшурулмагъа гереклигин унутмагъа тюшмей.
Районну ва республиканы ёлбашчылары билим берив, савлукъ сакълав, маданият ва спорт идараланы къурулувда ва ремонт этивде оьзлерден болагъан кёмегин этежегин ташдырмагъа боламан, — деди шо ерде районну башчысы Магьмут Амиралиев.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
