Къакъашурада воркаут-майданча
Артдагъы йылланы боюнда районубузну ичиндеги бары да юртларда федерал, регион ва муниципал проектлер ва программалар яшавгъа чыгъарыла. Ачыкълашдырып айтгъанда, шо оьрде эсгерилген программалар ва проектлер яшавгъа чыгъарылса, адамланы социал-экономика яшаву, яшавлукъ-коммунал шартлары яхшылашажагъы белгили.
Олар булан янаша билим берив, савлукъ сакълав, маданият ва спорт биналагъа да тергев берилип тура. Масала, школалагъа, больницалагъа, маданият уьйлерине, яшлар бавларына, спорт идаралагъа уллу ремонтлар этиле.
Алдагъы гюнлерде Къакъашура юртда бир уллу сююнч ва шатлы агьвалат болду деп айтмагъа ярай. «Спорт – яшавну нормасы» деген спорт оьсювню проектине гёре онда воркаут-майданча ачылды.
Шо шатлы чарада Къарабудагъгент районну гьакимбашы Магьмут Амиралиев, район администрацияны физкультура ва спорт бёлюгюню ёлбашчысы Завур Умаракъаев, Къакъашура юртну башчысы Уллубий Билалов, юрт Жыйыныны депутатлары, ерли халкъ ва яшёрюмлер оьзлени ортакъчылыгъын болдурдулар.
Эсгерилген воркаут-майданча гьар тюрлю спорт упражнениелер оьтгермек учун спорт къураллар булан ясандырлгъан. Шо спорт къуралларда яшлар машгъул болагъан вакътиде оланы савлугъуна ва къаркъарасына зарал болмажагъы да ачыкъ. Неге тюгюл де, спорт къуралланы шолай шартлары бар.
Воркаут-майданчаны умуми майданы 350 квадрат метрден уллу. Шо майданчаны тизмек ва онгармакъ учун 2 миллион 200 минг манат харж гёрсетилген.
Шатлы чараны барышында районну башчысы Магьмут Амиралиев шу воркаут-майданчада юртлу яшёрюмлер ва спортчулар оьзлени спорт усталылыгъын артдырмагъа болажагъын эсгере туруп, оланы савлугъу да беклешдирилежегине инанагъанын айтды.
Сонг да ол яшлагъа охувда ва спортда оьрлюклер ва уьстюнлюклер ёрады.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
