Меню
16+

Сетевое издание "Району яшаву"  «Будни района»

15.07.2022 10:05 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Валентина Матвиенко Дагъыстанда

Автор: Багьавутдин Самадов

Июль айны 11-12-нде РФ-ни Федерациясыны Советини ёлбашчысы иш сапар булан бизин республикабызда болду. Ону аэропортда ДР-ни Башчысы Сергей Меликов, РФ-ни Федерациясыны Советини Дагъыстанны вакили Ильяс Умаханов ва оьзге гьакимлер къаршыладылар. Оьзюню шо иш сапарында Валентина Матвиенко Магьачкъала ва Дербент шагьарларда болду, олай да республиканы даражасында юрюлеген ишлени тергев этди, шо гьакъда генгешлер ва ёлугъувлар оьтгерди.

Инг башлап В.Матвиенко аэропортда бугюн-буссагьат юрюлюп турагъан янгыртывланы барышына оьзюню тергевюн этди. Демек, аэропортну ёлбашчысы Сайит Рамазанов федерал бюджетден таба аэропортну ремонт этмеге ва ясандырмагъа гёз алгъа тутгъанын айтды. Олай да, аэропортда болагъан рейслени санаву артажагъын ва дагъы да 200 адамгъа янгы иш ерлер болажагъын айтды.

Оьзюню сапарында Федерацияны Советини ёлбашчысы Каспийск шагьарда 250 гиччипавгъа къурулгъан яшлар бавуна тергев этди. Демек, гиччипавлар учун яшлар бавунда кёп уллу онгайлыкълар болдурулгъан, айрокъда, аш биширеген бёлюк янгыртылгъан. Шо яшлар бавунда яшланы 14 гюп къабул этежек. Эсгерил­ген яшлар баву янгы охув йылны башында ачылажакъ.

ДР-ни Башчысы Сергей Меликов Валентина Матвиенкону «Лезгинка» бийивню уью къурулагъан хас ер булан да ювукъдан таныш этди. Айтагъаным, 4 къабатлы бина къурулмагъа гёз алгъа тутула. Шону ичинде ансамбль ва ону бийивчюлери учун бары да шартлар болдурулажакъ. 120 адам сыягъан конференц залда шатлы чаралар юрюлежек. Эсгерилген бина «Маданият» деген национал проектге гёре къурула.

Шо гюн олар Магьачкъаладагъы 42 номерли орта школада да болдулар. Алдагъы гюнлерде шо школагъа ону выпускниги Россияны Игити Нюрмагьаммат Гьажимагьамматовну аты къоюлгъан. Демек, Н.Гьажимагьамматов Украинада юрюлеген хас дав чарада, оьзюню ёлдашларын якълай туруп, душманны къолуна тюшмейли жан берген. Шо школада В.Матвиенко патриот тарбиялавгъа республиканы ёлбашчылары айрыча агьамият берегенин эсгере туруп, дагъыстанлылар гьар заман оьзгелеге игит ва къоччакълыкъ­ якъдан уьлгюлю болгъанын ­ачыкълашдырды.

Каспийск шагьардагъы 14 номерли лицейни директору гьюрметли къонакъланы школаны майданчасында къаршылады ва ону бугюнгю яшаву гьакъда хабарлады. Демек, 500 охувчу учун къурулгъан школада бары да дарслардан тарыкъ-герек материал-техника алатлар ва къураллар бар, савлугъун беклешдирмек учун да спорт зал ва оьзге дагъы да шартлар яратылгъан. Школаны муаллимлери булангъы лакъырында Валентина Матвиенко 2024-нчю йылда 3 сменли охув тайдырылмагъа гёз алгъа тутулгъанын ташдырды.

Савлай Россиягъа аты белгили шаир къатыныбыз Фазу Алиеваны бу йыл 90 йыллыкъ юбилейи белгилене. Валентина Матвиенкону республикабызгъа сапар гелгени булан пайдаланып, шаир Фазу Алиеваны эсделигине мемориал тахта ачылыв чара болду. Шо чараны барышында В.Матвиенко эсгерген кюйде, ол Фазу Алиеваны ювукъдан таный болгъан ва ону шиъруларындан яшавунда ругь ала. Шо ерде Фазу Алиеваны уланы Жамболат Магьамматов Валентина Матвиенкогъа оьзюню анасыны лап артда чыкъгъан китабын савгъат этди.

Бизин республикабызгъа этген сапарыны барышында РФ-ни Федерациясыны Советини ёлбашчысы Валентина Матвиенко, озокъда, бырынгъы Дербентде де болду. Ол ва ону узатагъанлар, гьаманда йимик, «Нарын-Къала» бекликге бардылар. Шо бекликни алдында оланы шербет, пахлава ва оьзге татлилик­лер булан къаршыладылар. «Нарын-Къала» музейни ёлбашчысы абурлу къо­накълагъа экскурсия ­оьтгерди.

Шо сапарда Дагъыстанны къатынларыны Союзуну ёлбашчысы Интизар Мамутаева Федерацияны Советини ёлбашчысы Валентина Матвиенкогъа дагъыстанлы усталаны явлугъун ва Фазу Алиеваны атындагъы эсделик медалны тапшурду. В.Матвиенко, огъар баракалласын билдирген сонг, республиканы жамият ва сиясат ишлеринде къатынгишилени гьаракатчылыгъын гёрсетип ортакъчылыкъ этмеге таклиф этди.

РФ-ни Федерациясыны Советини ёлбашчысы Валентина Матвиенко ва ДР-ни Башчысы Сергей Меликов Дагъыстанны социал-экономика ­оьсювюню масъалалары гьакъда генгеш оьтгерди.

Генгешни аввалында В.Матвиенко дагъыстанлыланы Къурбан Байрам булан къутлады ва яхшылыкълар ёрады. Сонг ол оьзю баргъан ва гёрген биналаны, шоларда юрюлюп турагъан ишлени гьакъында оьзюню ойларын айтды.

В.Матвиенко 2021-нчи йылны март айыны баш гюнлеринде РФ-ни Федерациясыны Советинде Дагъыстан АССР-ни 100 йыллыгъына багъышлангъан чаралар оьтгерилгенин айт­гъан сонг, республикабызны бугюнгю гьалына байлавлу хас къарарлар къабул этгенлигин эсгерди.

«Дагъыстанны социал-экономикасыны оьсювюне байлавлу болуп къабул этилген хас къарарларыбызны бир гесеги яшавгъа чыгъарылгъан, къалгъанлары да – чыгъарылажагъына инанаман. Шоланы уьстюнлю кюйде чечмек учун РФ-ни Федерациясыны Совети гьар даим республикагъа кёмегин болдуражакъ», – деп ташдырды В.Матвиенко.

Олай да Валентина Матвиенко тахшагьарыбыз Магьачкъаланы бугюнгю гьалын танкъыт этип сёйледи. Айтагъаным, рекламалар язылып илинген такъталар ва стенд­лер шагьарны гёзеллигин ва адамланы гёнгюн бузагъанын эсгерди. Сонг да урушбатчы­лыкъ (коррупция) республикабызда далапчылыкъ­ны алдына тогъас болагъанын ачыкълашдырды.

ДР-ни Башчысы Сергей Меликов РФ-ни Федерациясыны Советини ёлбашчысы Валентина Матвиенко берген таклифлеге ва этген танкъыт­гъа баракалласын билдирген сонг, савлай уьлкебизге билдирилген экономика санкцияланы авурлугъуна да къарамайлы, бизин республикабыз алгъа багъып барагъаны гьакъда маълуматлар берди.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

4