Мол тюшюмлени гьайы этиле

«Танг» совхозда оьзюне Бийгиши Айдиев башчылыкъ этеген биринчи бёлюкню ишчилерини, механизаторларыны къайратлы загьматы, юзюм болдурувда ва пачалыкъгъа сатып беривде етишген уьстюнлюклери гьакъда шо девюрде аз язылмады. Яш юзюмчюлер, касбучулар бугюнлерде Б.Айдиевден сынав акътара туруп гелелер.

Сыйлы мердешлени Бийгишини уланы Абдулмуслим инамлы кюйде узата. Сабанчы-фермер хозяй­ствону ёлбашчысы гьисапда авлакъ ниъматлар болдурувну гьайында турагъанны айтма тарыкъ. Абдулмуслим Айдиев авур къол загьматдан, юрт хозяйство тармакъны авурлукъларындан къоркъагъан адам тюгюл.

Алдагъы гюнлерде мен А.Айдиев булан ёлукъгъанда ишлени гьакъында баянлыкъ алдым. Ол булай деди:

– «Б.А.Айдиев» деген сабанчы-фермер агьлюню 18 гектарда юзюм бавларыбыз бар. Шо участкаланы 12 гектары планлы кюйде тюшюм береген юзюмлюклер. Ондан къайры да бизин2,5 гектар ерде баъли , шочакъы ерде шаптал бавубуз да бар. Емиш тереклер интенсивный къайдада орнатылгъан бавлар.

– Баъли – байлыкъ бир айлыкъ дегенлей, баълини тюшюмю къайтарылып битген. Бугюнлерде шапталны эрте бишеген журалары жыйылып тура. Тюшюм яман тюгюл, гектаргъа гьисап этген 160 центнер баъли берди. Шаптал бавну тюшюмю де шолай болур деп умут этемен.

Бугюнлерде бары гюч юзюм бавгъа бакътырылгъан. Борланы бары да къуллукълары заманында кютюле геле. Аврувланы, зиянлы жанланы алдын алыв мол тюшюм учунгъу гьаракатда айрыча ерни тута, — деди фермер.

«Б.А.Айдиев» деген сабанчы-фермер агьлюню юзюм, емиш бавлары тамчы къайдада сугъарыла. Мол тюшюм учунгъу гьаракатда КФХ-ны башчысы участкаланы минерал кюйлевючлер булан азыкъландырывгъа да айрыча агьамият берегенин де яшырмады.

Ишни белин сындырып ишлеп гелген ожакъдан чыкъгъан Абдулмуслим де оьзлени къайратлы загьматы булан авлакъ ниъматлар болдурувда, районну социал-экономика оьсювюне оьз къошумун этежегине шекленме тюшмей.