Гьасил чыгъарыв генгеш

Генгешни биринчи масъаласы деп Избербаш шагьарда 2023-нчю йылгъа берилген бюджет заявкагъа гёре 300 койка ери булангъы больницаны ишлемек учун гёрсетилмеге герекли харжлагъа къаралды.

Больница 2009-нчу йыл ишленме башлангъан, тек 2014-нчи йылдан берли шо иш токъталгъан. Объектни битдирмек учун тезликде тарыкъ чаралар гёрюлмеге гереги гьакъда С.Меликов къатты тапшурувлар берген.

Шо масъалагъа гёре Избербаш шагьарны башчысы Магьаммат Исаков, ДР-ни савлукъ сакълав министри Татьяна Беляева ва регионда къурулуш министерликни башчысы Артур Сулейманов ёлдашлар чыгъып сёйлеген.

С.Меликов гьалны танкъыт этип сёйлеген сонг, август айны 1-не къурулуш объектге жаваплы вице-премьер Мурад Казиевге масъаланы заманында чечмек учун мекенли чаралар гёрмекни буваргъан.

В.Матвиенко гётерген республика бюджетни пайдаландырыв масъалагъа гёре, ДР-ни Гьукуматыны Председателини биринчи орунбасары Руслан Алиев ДР-ни финанс ишлеге къарайгъан министерлигине гёрсетил­ген харжланы, тёлевлени, къурулгъан дыгъарланы гьакъында сёйлеген.

Оьзюню сёйлевюнде Р.Алиев ведомстволарда гёрсетилген харжланы пайдаландырма бажарылмай къалар деген къоркъув ёкъ экени гьакъда айтгъан.

Олай да, башгъа ведомстволаны бюджетни пайдаландырыву ва къолланыву гьакъда вице-премьерлер Манвел Мажонц, Ризван Гъазимагьамматов, Мурат Казиев ва Муслим Телякавов гьисап берип сёйлеген.

Оьзлени сёйлевлеринде олар Къызлар шагьарда узакъ заман созулуп къурулагъан маданият оьсдюрюв Центрны масъаласыны уьстюнде айрыча токътагъан. Шо къурулушларда чыкъма герекли гёрсетилген акъча маялар къолланмай къалмакълыкъ да бары гьакъда айтгъан. Къурулуш ишлеге гёрсетилген 134 миллион манатны 25-и тюгюл пайдаландырылмагъан.

Арт вакъти субподрядчик алышынып, шо иш бираз чалтлашгъанын да олар эсгерген. С.Меликов гёз алгъа тутулгъан иш заманында этилмегени саялы, гю­нагьлылар такъсыргъа тартылажагъын генгешни ортакъчыларына англатгъан.

Школаланы 2022-нчи йылда оьтгермеге герекли капитал ремонту гьакъда генгешде билим берив ва илму министри Ягьия Бучаев сёйлеген. Муниципалитетлеге капитал ремонтлар оьтгермек учун 1,6 миллиард манатдан да къолай акъча берилген.

Министрни сёзлерине гёре, 41 объектде капитал ремонт ишлер 70 процентге этилинип геле. 119 объектде ишлер этилмеге гёрсетилген графикден хыйлы артда къалып юрюй, демек 55 процент­ден де аз иш этилген.

Олай да, оьзюню сёйлевюнде Я.Бучаев 2024-2025-нчи йылларда школаланы капитал ремонт этмек учун муниципал къурулувланы башчылары заявка кагъызларын тюз ва заманында гьазирлеп бермеге герегин эсгерген.

ДР-ни Башчысы С.Мели­ков Шамил районда Хебда юртдагъы школа капитал ремонт программагъа къошулуву не канзиде экенин ахтаргъан. Школа 1959-нчу йыл къурулгъан, тезден берли эсгиленген. Школа капитал ремонт этилмеге гереги гьакъда ДР-ни Башчысы масъаланы гьалиден хыйлы алда гётерген болгъан. Тек гьалиге шо ишде алгъа барыв ёкъ.

Министр айтагъан кюйде, эсгерилген школагъа 2021-нчи йыл документлери тюз къурулмагъаны саялы, федерал бюджетден субсидия акъчалар гёрсетмеге бажарылмагъан.

Масъалагъа гёре С.Ме­ликов тезликде алгъасавлу чаралар гёрмеге жаваплы къуллукъчулагъа тапшургъан.

Генгешни барышында къаралгъан яшавлукъ-коммунал объектлени гюз-къышлыкъ сезонгъа гьазирленив масъала гьакъда ДР-ни Гьукуматыны Председателини Биринчи орунбасары Манвел Мажонц сёйлеген.

Ол айтагъан кюйде, ДР-ни Башчысыны тапшурувуна гёре ЖКХ объектлени гюз-къыш замангъа гьазирлик гёрмек учун Республика штаб къурулгъан.

Оьзюню сёйлевюнде вице-премьер этилген ва этилмеге гёз алгъа туулгъан ишлени гьакъында айтгъан. Олай да, Дагъыстанда биринчи Гюн электростанция ачыл­гъанын да эсгерген. Янгы станция Ставрополь крайдан Дагъыстангъа гелеген электрик токну кемитип, Ногъай, Тарумов районлагъа, Южно-Сухокумск шагьаргъа электрик токну бакъдырма болажагъын англатгъан. Июль айны 11-нде ачылгъан станцияда 40 минг гюн модуль бар. Станцияны кёмеги булан гьар йыл айланагъа яйылагъан углекислый газ 7 минг тонгъа кемижек.

Шолай станция Ногъай районда да къурма гёз алгъа тутулгъан. Генгешни ишин тамамлай туруп, С.Меликов: «Барыбызны да Гюн электростанцияны ачылыву булан къутлайман. Бизин шо проектибизни Россияны Президенти ва Гьукуматы арив гёрдю ва якълады»,- деген.