Меню
16+

Сетевое издание "Району яшаву"  «Будни района»

15.07.2022 10:01 Пятница
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Ашлыкълар къайтарыла

Автор: Шихав Къайирбеков

Яйны яллавлу гюнлери. Къыргъа чыкъсанг башынгны майларын иритемукен деп эсинге геле. Тез-тез башынгны сукъма салкъын ер излейсен. Бу исси гюнлер юртлу загьматчылагъа кар этмей. Олар мол тюшюмлени гьайын эте туруп иссиге де, сувукъгъа да тюшгенлер. Бир сёз булан айтгъанда, чыныкъгъан, авурлукълагъа чул билдирмей загьмат тёгелер.

Бугюнлер районну авлакъчылары учун инг къыставлу гюнлер. Бу йыл­ны тюшюмю учун гетген гюзде чачылгъан гюзлюк къылчыкълы, эрте язбашда чачылгъан къылчыкълы язлыкъ ашлыкъланы тюшюмюн тас болувлагъа тарытмай къолгъа алмакъ учун бары гюч бакъдырылгъан.

2022-нчи йылны тюшюмю учун районда умуми алгъанда 14897 гектар майдандагъы гюзлюк ва язлыкъ къылчыкълы ашлыкъланы тюшюмюн къайтарма тарыкъ.

Районну юрт хозяйство управлениесини баш касбучулары береген маълуматлагъа гёре ерлерде аш­лыкъ къайтарывгъа 30-35 комбайн къуршала, гьар комбайнге таман даражада ашлыкъны ташыйгъан автотранспорт бегитилген.

Районда авур шартларда буса да къылчыкълы ашлыкъланы тюшюмюн къайтарыв къурумлу юрюле деп айтма ярай. Буссагьатгъы вакътиде районда 4900 гектар майданланы ашлыгъы къайтарылып битген. Буссагьатгъы вакътиде гектар орта гьисапда 23 центнер тюшюм бере. Касбучулар инандырагъан кюйде, кёбюсю участкаланы тюшюмю 30-35 центнер болма тарыкъ.

Ашлыкъны тюшюмюн къайтарыв Гьели юрт муниципал къурулувда жанлы башланды ва къурумлу кюйде юрюле. Гьелини топуракъларында ашлыкъ къайтарывгъа 11 комбайн къуршалгъан. Бир нече гюнден юртда ашлыкъланы тюшюмюн къайтарыв тамамланажакъ.

Гьелили ашлыкъ оьсдюрювчюлени ишлери гьакъда айта туруп, «Мурат» деген сабанчы-фермер агьлюню уьюрю, районну сынавлу ва алдынлы фермери Магьамматсайит Абсаматовну къайратлы загьматын айрыча эсгерме тюше. Бу ёлдаш топуракъны хадирин биле. Чинкдеси, чачывланы бары да къуллукъларын агротехника талап этеген болжалларда сан янлы кюйде оьтгере. 2022-нчи йылны тюшюмю учун Магьамматсайит Абусаматовну 500 гектарда къылчыкълы ашлыкълары бар. Ол ашлыкъ къайтарыв компанияны алдында лизингге янгы комбайн да алгъан, яхшы иш чыгъарып ишлей. Фермер 500 гектардагъы ашлыкъларыны 300 гектарны тюшюмюн къайтарып битген. Гектар орта гьисапда 25 центнер тюшюм бере. Тавтюпде ерлешген Къакъашуралы ашлыкъ оьсдюрювчюлер де бу йылны тюшюмюн къайтарма башлагъанлар. Башлапгъы гюнлер 120 гектар ерни тюшюмю къайтарылгъан.

Ашлыкъланы тюшюмюн къайтарыв Губден юрт муниципал къурулувда да барышы яман гёрюнмей.

Районда савлай алгъанда ашлыкъ­ланы тюшюмюн къайтарыв къурумлу бара деп айтсакъ да тюз болмас. Къурбуки юртну айланасындагъы ашлыкъ тарлавлар башдан эшеген еллеге толкъун уруп тура. Тек, июль айны ортасы болуп тура, тарлавда ишлейген гьеч комбайн гёрюнмей. Сабанлыкълар яхшы оьсген, чёп отлардан таза. Амма Къурбукили ашлыкъ оьсдюрювчюлер къылчыкълы ашлыкъланы тюшюмюн къайтарыв­гъа техниканы алданокъ онгарып гьазирлик линейкагъа салмагъан. Ашлыкълар бишгенде комбайнны моторуна ремонт этеген заман тюгюл.

Районда ашлыкъ къайтарывну барышы гьакъда айта туруп, от тюшювлени алдын алыв чаралар тюз салынмайгъанын да айтма тарыкъ. Ашлыкъ тарлавланы башында сабаны булан техника, сув машин болма юше. Шолар бары да ерлерде бар деп айтма болмайбыз.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

2