Меню
16+

Сетевое издание "Району яшаву"  «Будни района»

13.05.2022 10:10 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Къолларын ва гёзюн давда къоюп…

Автор: Нюрсагьадат Изамутдинова

Муна, Уллу Уьстюнлюкге 77 йыл тамамланды. Уьстюнлюкню ювукъ­лашдыргъанланы арасында бизин кёп игитлерибиз бар. Биз олагъа, демек оланы эсделигине бугюнде де гьюрмет этебиз. Оланы игитликлерине битмейген макътавлар эте туруп, оьсюп гелеген яш наслуну энниден сонг да олагъа абур да, гьюрмет де этмеге чакъырабыз.

Уьстюнлюкню гелтирмек учун жанын-къанын аямай ябушгъан къоччакъ уланланы гьариси бир тюрлю игитлик гёрсетген, гележек наслуну парахат яшаву саялы оьзлер болагъанны этген.

Шолай игитлерибизни арасында эки де къолуну билекден тёбен ягъын да ва бир гёзюн де давда къоюп гелген Игитибиз Умар Арсланбековну атына айрыча гьюрмет этмеге тийишли деп айтсакъ, тюз болур.

Уллу Ватан давдан Дёргели юртлу Умар Арсланбеков тап шолай къайтгъан.

Умар Арсланбеков яш ва жагьил йылларындан тутуп бек жагь, спортда чыныкъгъан, къатты ва гьаракатчы улан болгъан. Ол атны уьстюнде бек къурч ва жыйнакълы токътап болагъан, турниклерде бары да тенгилеринден кёп тартылма бажарагъан улан болгъан. Школаны битгенде Умар Арсланбеков асгерге гете. Ол асгер къуллугъун кютюп турагъанда, белофиннлер булан дав башлана (1939-1940-нчы йыллар). Дав башланып биринчи гюнден тутуп, ол оьзюню къоччакълыгъын гёрсетме бажара.

Белофиннлер бийикликге де минип, бизин солдатлагъа атышмагъа башлай. Шо заман оланы атышывуну натижасында байлавлукъ ток теллер уьзюле. Ротаны командири Умаргъа оьзюгер кёмекчи де алып байлавлукъ ток теллени онгармагъа тапшурув бере. Олар генг авлакъгъа барып, командирни тапшурувун яшавгъа чыгъармагъа борчлу бола. Янгурлу чакъ, гелеген сыгъанакъ… Шо аралыкъда артдан гелеген Умарны кёмекчиси гёрюнмейген болуп къала. Узакъ къалмай Умар яралангъан къурдашын таба, тек огъар кёмек этмеге ону заманы болмай.

Ол тезликде ток теллени уьзюлген ерин таба ва онгармакъ учун терекге мине. Байлавлукъ теллени ялгъап тюшген сонг, Умар къурдашын да гётерип оьзюню бёлюгюне геле.

Сонг, белгили кюйде, Уллу Ватан дав башлана.

Умар Арсланбеков гёнгюллю кюйде биринчи гюнюнден тутуп давгъа гете. Сержант Умарны уьч айлыкъ курслагъа бакъдыра. Сонг ол полкда саперланы бёлюгюню командири этилип белгилене. Шолайлыкъда, ол Туапсе шагьарда юрюлеген инг уллу давда ортакъчылыкъ эте.

Буланы бёлюгюне душманны ёкъ этмеге, гьужум этмек учун тав бетге барагъан ёлну миналардан тазаламагъа тапшурув бериле.

Тазалангъан ёл булан бизин солдатларыбыз душманны къувалама башлай.

Шо ябушувда У.Арсланбековну бёлюгю 15 танкны ёкъ этме бажара.

1943-нчю йыл Украинада темир ёлну ягъасы булан къамушлукъларда фашистлер яшынгъаны белгили бола. Умарны бёлюгюне бирдагъы да совет солдатлар юрюжек ёлну миналардан тазалама буйрукъ геле.

У.Арсланбеков оьзюню солдатларын биринден бирин 10 метр арекге тизип, авлакъны миналардан тазалав ишине гиришелер.

Шолайлыкъда арт-артындан миналаны тайдыра туруп гелегенде, бир мина атылып къала ва Умарны бир якъгъа багъып ташлай.

Эси гелгенде, Умар госпитальда оьзюню эки де къолуна ва гёзюне операция этилгенни биле. Жагьил улангъа къолларсыз ва гёзсюз къалмакъ оьтесиз авур тие. Тек къоччакъ Умар гиччиден берли бек ягьлы, къатты ругьу булангъы улан экенге гёре, ругьдан тюшмей, Аллагь оьзюгер берген къысматны тийишли кюйде къабул эте.

Къоччакълыгъы ва игитлиги саялы Уллу Ватан давну 1-нчи даражалы ордени ва бир нече медаллары булан савгъатлангъан Умар Арсланбеков уьйге къайта.

У.Арсланбеков – юртлуларыны оьктемлиги. Олар гьар даим ону эсделигине гьюрмет ва битмейген макътавлар эте.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

3