Игитлиги унутулмай

Давдан сав къайтгъанлары да бугюнлерде бизин арабызда ёкъ. Гьали энни бизин борчубуз – оланы эсделигине амин болмакъ, унутмай эсде сакъламакъ, абур этмек! Гьали мен Ватаны, халкъы учун душман булан ябушгъан, эсделиги гьар даим макътавгъа лайыкълы уланланы бириси дёргелили игит Абакар Залибековну гьакъында язма токъташдым.

Абакар Залибеков 1931-нчи йылдан башлап Дёргели школада башлапгъы класланы муаллими болуп ишлеген.

Ол гюндюзлер школада яшланы охута болгъан, гечелер буса охуп-язып билмейген уллуланы охума-язма уьйретген.

Абакар Залибековгъа юртлулар уллу гьюрмет эте болгъан. «Ол тюз гьакъыллы, бек рагьмулу ва таза юрекли адам болгъан»,-дей ону гьакъында юртлулары.

1939-нчу йыл ону дёргелилер «Ворошилов» деген колхозну ёлбашчысы этип сайлай. Оьзюгер тапшурулгъан ишине бютюнлей тюз янашагъан А.Залибеков колхозчуланы да ишге ругьун гётерген. Шо йыллар колхозну иши хыйлы алгъа бара, экономикасы гётериле. Юрт­лулар огъар абур эте, иш сорай… Тек хапарсыздан башлангъан Уллу Ватан дав адатып къоя. Бу къайгъылы ва аччы хабар юртлуланы бир ерге жыя. Абакар Залибеков биринчилерден болуп гёнгюллю кюйде давгъа гетме сююп арза кагъыз яза. Шолай, 1942-нчи йыл ол давгъа гете. Ол разведкачы этилинип белгилене, сонг А.Залибеков инг къоркъунчлу разведка бёлюкню командири бола.

Дав майданда А.За­либековну бёлюгю душманны пехотасы булангъы уьч машинни ва эки танкны яллата, танкланы ва машинлени экипажларын пленге ала.

Совет солдатлар Курск шагьарда къызгъын давлар юрютегенде, оьзлени бар гючюн Борисовка районгъа бакъдыра. А.Залибековну бёлюгю шо гьакъда тез биле. Эки къурдашы да булан А.Залибеков разведкагъа баргъанда, уллу атышывлар болуп, дав башланып къала. Разведкачыланы эс этген немис-фашистлер буланы пленге алма сюе. Тек бизин разведкачыланы къолгъа барма къасты ёкъ, атыша, игит кюйде дав юрюте. Тек кёп санавдагъы душманны енгме рагьат иш тюгюл. Шо давда Абакар Залибековну эки де къурдашы къоччакъ кюйде жан бере. Яп-янгыз къалгъан Абакар, тюбеги булан атышып, эки душманны оьлтюре. Сонг оьзюгер багъып гелеген фашистлеге багъып гранатны ташлап, кёп душманны къыра, тек оланы арты булан бугъар багъып дагъы да фашистлер етише.

Къоччакъ солдат Абакар Залибеков, ахырынчы гранатны атылтып, душманланы да оьлтюре, оьзю де оьле. Дёргели юртда Уллу Ватан давну къоччакъларына салынгъан монументде алтын варакъ булан давда жан берген Абакар Залибековну аты да язылгъан.

Игитлени атлары бир заманда да унутулмай. Оьзлер оьлсе де, оланы атлары халкъыны эсинде даимликге къала.