Магьмут Амиралиев: «Аслу масъалаланы чечмекни гьайында…»

“Алдагъы гюн Россия Федерацияны Президенти Владимир Путин ДР-ни Башчысы Сергей Меликов булан ёлукъгъан ва бизин республиканы аслу масъалаларын арагъа салып ойлашгъан.

Ёлугъувда олар коронавирус инфекцияны яйылыву, халкъгъа вакцина этивню темплери ёрукълашгъаны, халкъгъа сув быргъылар тартыв ва сув булан таъмин этив, олай да юртхозяйство ва айрокъда юзюмлюклени майданларын генглешдирив масъалаланы барышы гьакъда сёйлеген. Гетген йыл Дагъыстан юзюм жыйывда уьстюнлюклеге етишгени, ону мол тюшюмюн къолда этгени гьакъда да С.Меликов В.Путинге хабарлагъан.

ДР-ни Башчысы С.Меликов РФ-ни Президенти В.Путинге республикада юзюмчюлюк булан бирче чагъырчылыкъ да оьсегенин айтгъан.

Айтагъаным, бизин Къарабу­дагъгент район гюнешни емишин болдурувда ва ону жыйывда гьар йыл республикагъа гёрмекли къошумун эте. Юзюмчюлюкню оьсювюнде бизин районну гьаракаты айрыча гёрмекли ерни тута. 2022-нчи йыл бизин районда юзюмлюклени майданларын оьсдюрмек учун 50 гектар топуракъны орнуна 52 гектаргъа плантаж этилди. 2022-нчи йылны башына – 2128 гектар ердеги юзюм­люклерибизни 390 гектары – яш юзюмлюклер, къалгъан топуракълардагъы – тезден къолланып, ишлетилип турагъан юзюмлюклер.

Артдагъы 5 йылны ичинде 428 гектаргъа янгы юзюмлюклер чачылгъан, демек янгы юзюм бавлар болдурулгъан.

2021-нчи йылда бизин район 19,8 минг тондан да къолай юзюм жыйгъан, шо, 2020-нчы йыл булан тенглешдиргенде, 7 минг тонгъа кёп.

Юзюмчюлюкню оьсювю, озокъда, янгы иш ерлер де болдура. Шо районлулар учун янгы ва яхшы имкан­лыкълар болуп токътай. Иши ёкълар учун шо яхшы кёмек болагъаны ачыкъ.

ДР-ни Башчысы С.Меликов Россияны Президентини гьар бир якъдан якълаву ва кёмеги булан республикабызны аслу масъалаларын чечмеге айланагъан гьаракатын биз ачыкъдан гьис этебиз”.