Меню
16+

Сетевое издание "Району яшаву"  «Будни района»

29.04.2022 08:53 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

«Эсделикни вахтасы»

Автор: Нюрсагьадат Изамутдинова

Апрель айны 26-нда Къарабудагъгент юртдагъы У.Буйнакскийни атындагъы ял алагъан бавда Игитлени эсделигини алдында Уллу Ватан давда совет халкъ немис-фашистлерден уьст гелгенли 77 йыл тамамланагъанына гёре «Эсделикни Вахтасы» деген акциясыны ачылывуна багъышлангъан шатлыкъ митинг оьтгерилди.

Инг башлап митингни ортакъчылары Уллу Ватан давну Игитлерини эсделигине жанлы гюллер салды, сонг оланы эсделигине бир минутлукъ шыплыкъ билдирилди.

Чараны ачгъан Баш китапхананы алдынлы китапханачысы А.Пашаева районда адатлангъан кюйде, «Эсделикни Вахтасы — 2022» деген акция башлангъанны айтды.

- Россияда давну агъусу тиймеген бир агьлю де ёкъдур. Биревлени аталары, бирлерини уллаталары, агъалары, улланалары давларда ортакъчылыкъ этген, олай да тылда давдагъылар учун загьмат тёкген. Гьар ким оьзю болагъан кюйде шо йыллар Уьстюнлюкню гюнюн ювукълашдыргъан. Ватанны къысматы биревню де гёнгюлсюз къоймагъан. Бизин арабызда Уллу Ватан давну тарихин билмейгенлер, шогъар тергевсюзлер болма тарыкъ тюгюл. Биз барыбыз да уьлкебизни гетген яшавун эсибизде сакълама борчлубуз. Шолай болмаса, фашизм такрарланма имканлыкъ тувулуна. Уьстюнлюкню гюнюн гёрмегенлени, шо къуванчны сезмегенлени эсделигине биз айрокъда бек борчлубуз. Олар бизин парахат яшавубуз учун къурбан болгъан. Шо саялы биз «Эсделикни Вахтасын» оьтгеребиз. Бизге къарап гележек наслу да эсделиклерибизге абур этмеге уьйренежегине инанабыз, – дей А.Пашаева.

Митингни ортакъчыларын районну яшёрюмлерини ва социал сиясат бёлюгюню ёлбашчысы Гюлжанат Темирова къутлады.

- 77 йыл алда совет асгерлер булан бирче уьлкебизни бары да халкъы хапарсыздан чапгъын этген немис-фашистлерден Ватанны къутгъармакъ учун оьзлер болагъан гьаракатны этген. Бирлери давда, бирлери тылда Уллу Ватан давда уьст гелмек учун дав ва загьмат батыр­лыкълар гёрсетгенлер. Бирлешген гюч Уьстюнлюкню гелтирген! Тек гючлю ва рагьмусуз давда уллу тас этивлер болгъан, кёп жагьил уланланы ва къызланы яшаву къыркъылгъан, юрт­лар ва шагьарлар тозулгъан. Тек бизин Совет уьлкебиз душмандан уьст гелген, бизин олардан азат этген!

Бизин учун къурбан болгъанланы эсделигине амин болмакъ – бизин тувра борчубуз. Биз олагъа гьар даим макътав этебиз! Яш наслуну да оланы эсделигине гьюрмет этме чакъырабыз, — деди Гюлжанат Темирова.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

3