Субботниклер узатыла
Къарабудагъгент районну башчысы Магьмут Амиралиевни буйругъуна гёре, апрель айны 16-ндан 30-уна ерли гьар сонгугюн районну юртларыны гёзеллигин сакъламакъ, тазалыгъын болдурмакъ учун субботниклер оьтгериле.
Бу йыл тазалыкъ болдурув чаралар Бютюн Россияны «Яхшылыкъны язбашгъы жумасы» деген гьаракатына гёре юрюле.
М.Амиралиевни буйругъун яшавгъа чыгъара туруп, районну ичиндеги идараларда, бары да охув ожакъларда ва яшлар бавларында субботниклер оьтгерилди.
Шолай да, Къарабудагъгент 1, 2 ва 3 номерли школаларда муаллимлер, охувчу яшланы да къуршап, школаларыны абзарларын тазалап, ёллардагъы нас-алагъожаланы жыйып къаплагъа тёшедилер. Сонг да Къарабудагъгент 2 номерли орта школаны яшлары муаллимлери булан бирче юртлу инкъылапчы, жамият чалышывчу Абдусалам Абакаровгъа салынгъан эсделикни айланасында да тазалыкъны болдургъанлар.
Олай да, бизин районну Уллубийавул юртунда да тазалыкъ болдурув булкъа оьтгерилди. Юрт администрацияны къуллукъчулары оьзлени идарасыны майданын тазалады. Шо гюн Уллубийавул орта школаны коллективи де субботник оьтгерди.
Апрель айны 16-нда Къакъашура 2 номерли орта школада муаллимлени, охувчуланы ва техника къуллукъчуланы гьаракаты булан школаны абзарында , бавунда, айланасында тазалыкъ болдурулду. Охувчулар тереклени тюплерин къазды, увакъ бутакъларын гесди, киреч чапды ва нас-алагъожаны къаплагъа алды.
Ондан къайры да, шу жуманы ичинде Къарабудагъгент юртдагъы Гь.Гьамзатовны атындагъы паркда 50 нарат терек орнатылды.
Тазалыкъ болдурув булкъалар районну юртларында гелеген жумаларда да оьтгермеге гёз алгъа тутулгъан.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
