Гьасиллер чыгъарылды, масъалалагъа къаралды

Сессияны гиришив сёз булан «Къарабудагъгент район» муниципал районну депутатларыны Жыйыныны председатели Адил Салаватов ачды ва юрютдю.

А.Салаватов, залдагъылар булан саламлашып битген сонг, депутатлагъа ва залдагъылагъа гезикли, 13-нчю сессиясыны гюнлюк иш низамын малим этди.

Шо гюнгю сессияда шулай масъалалар арагъа салынып ойлашылды:

1. Депутатланы район Жыйыныны депутатыны ихтиярларын тас­дыкъ этив.

2. «Къарабудагъгент район» муниципал районну 2021-нчи йылда социал-экономика оьсювюню гьасиллерине къаралды.

3. «Къарабудагъгент район» муниципал районну депутатларыны район Жыйыны 2022-нчи ва планлы 2023, 2024-нчю йыллагъа къабул этген район бюджетге алмашынывлар этив.

4. «Къарабудагъгент район» муниципал районну тергев-счёт палатасыны председателини гьар ай савгъатлангъан акъчаны токъташдырмакъ.

5. Районну муниципал мал-матагьын 2021-нчи йылда приватизация этив.

6. «Къарабудагъгент район» муниципал районну мунципал топуракъларын ва пачалыкъ есликдеги тек дазу салынмагъан топуракъланы сатывгъа чыгъармай мжарагъа береген къайданы тасдыкъ этмек.

Районну социал-экономика оьсювюне 2021-нчи йылда оьзлени къайратлы загьматы булан аслам къошумун этегенлени савгъатлав.

Сессияда арагъа салынып къаралгъан биринчи ва дёртюнчю масъалалагъа байлавлу район Жыйынын председатели Адил Салаватов маълумат этди.

Экинчи масъалагъа байлавлу районну башчысы Магьмут Амиралиев гетген йыл бизин район гьар тюрлю тармакъларда къолда этген гьасиллени теренден анализ этип сёйледи.

Сессияда оьзюню сёйлевюн Магьмут Амиралиев РФ-ни Президенти В.Путинни къарары булан Украинада бизин асгерлер юрютеген хас чарадан башлады. Шо къалмагъалларда бизин райондан 5 адам оьлгенин малим этди. Районну башчысы залдагъылагъа Украинада жанын къурбан этген ёлдашланы гьюрметине минутлукъ шыплыкъ билдирме таклиф этди.

Сессияда районну башчысы Магьмут Амиралиев 2021-нчи йылда умуми продукция болдурувну къадары районда 6799,5 миллион манатгъа етишгенин, 2020-нчы йылда шо санав 6268,8 миллион болгъанын аянлашдырды. Оьзюню сёйлевюнде районну башчысы районда юрт хозяйство продукталар болдурувда къолда этилген уьстюнлюклени санавлар булан ташдырды, айрокъда юзюмчюлюк тармакъда къолда этиле гелеген натижалар къуванчлы экенин де иштагьы булан эсгерди.

Сессияда оьзюню сёйлевюнде районну социал-экономика оьсювюнде оьз къошумун болдургъан савлукъ-сакълав, билим берив, маданият, спорт тармакъларда чалышагъан ёлдашлагъа, районну бары да ватандашларына баракалла билдирди.

Оьзюню сёйлевюн тамамлай туруп алгъа салынгъан масъалаланы яшавгъа чыгъарывда районда иш гёреген къурумланы, организацияланы ёлбашчыларына, депутатлагъа, юртланы башчыларына, озокъда районну активине тёкген загьматы саялы баракалла билдирди.

Сессияда районну башчысыны докладына гёре ЦРБ-ни баш врачы Расул Гьиравов, районну билим берив управлениесини ёлбашчысы Тажли Хизриева, Къурбуки юрт муниципал къурулувну башчысы Магьамматхабиб Магьамматгерев ва оьзге ёлдашлар чыгъып сёйледилер ва район администрацияны гетген йылгъы ишине лайыкълы багьа бердилер.

Сессияны гюнлюк ишине байлавлу район администрацияны акъча ишлер бёлюгюню ёлбашчысы Абакар Шагьманаев ва районну топуракъ, мал-матагь аралыкълагъа къарайгъан бёлюгюню ёлбашчысы Солтан Халилов ёлдашлар чыгъып сёйледилер ва депутатланы, сессияда ортакъчылыкъ этгенлени районну бюджетинде этилген алмашынывлар, топуракъланы сатывгъа чыгъармай ижарагъа беривню къайдаларын малим этдилер.

Оьтген сессияны ахырында депутатлар тийишли къарарлар къабул этдилер ва район администрация гетген йыл этген ишге рази къалдылар. Сессияны ахырында производствону алдынлылары савгъатланды.