Гетген йылны гьасиллери…

Украинада бизин уьлкени Савутлу Гючлери оьтгереген хас дав чара гьакъында айта туруп, Сергей Меликов булай деди:

- Россиягъа дагъы ёл къалмагъан эди. Шо саялы да Россияны ватандашларыны, шону ичинде бизин республикабызны халкъларыны авадан яны Владимир Путинни ва Россия Федерацияны Савутлу Гючлерин бютюнлей якълай.

Сергей Меликов Украинада бизин асгерлерибиз юрютеген хас чараны гьакъында сёзюн давам эте туруп, бизин уьлкени Савутлу Гючлери не ерлерде буса да оьтгереген дав масъалаланы кютюв, гьаманда йимик, гьали де дагъыстанлылар оьзлени лап яхшы, къоччакъ яндан гёрсетелер.

– Дагъыстанлы Нюрмагьаммат Гьажимагьамматов Украинада оьт­герилеген хас чарада оьзюню лап яхшы янындан гёрсетген. Россияны, Донбасны халкъларыны аманлыгъын, уьлкебизни харлысызлыгъын якълай туруп, бир де тартынмай жанын къурбан этген ва Россияны Игити деген атны алгъан деди, — С.Меликов.

«Дав майданларда жаны къурбан болгъан солдатларыбызгъа теренден къайгъырабыз. Мени атымдан, республиканы ёлбашчыларыны ва дагъыстанлыланы атындан, бары да яшланы ата-аналарына, дос-къардашларына, ювукъларына теренден къайгъырышабыз. Яралангъанлагъа тезликде сав болма, оланы ата-аналарына чыдамлыкъ, къатты­лыкъ ёрайман»,- деди регионну ёлбашчысы.

Сессияны ортакъчылары Украинада оьтгерилеген хас чараны натижасында жанын къурбан этген яшланы гьюрметине минутлукъ шыплыкъ билдирди.

Сессияда сёзюн узата туруп С Меликов 2021-нчи йылда республиканы гьукуматыны, ведомстволаны ишини гьасиллерин теренден анализ этип сёйледи. Бир-бир тармакъланы ишин къатты кюйде ­танкъыт этди.

Сергей Меликовну сёйлевюнден ачыкъ болгъаны йимик, 2021-нчи йылда республиканы промышленносту гёрмекли уьстюнлюклени къолда этген. Биринчилей, шогъар якълав продукцияны къадарыны артыву болушлукъ этген. Ондан къайры да, ватандаш продукция чыгъарагъан (Магьачкъала, Буйнакск) шагьарларда аякъ гийимлер этеген фабриклер, картон тара этеген цех ва электроэнергия яхшы гьасиллер гёрсете.

Республиканы промышленностуну гьакъында айта туруп, республиканы башчысы яшавгъа чыгъарма гёз алгъа 27 инвестиция проектлер барын, инвестицияланы къадары 14 миллиард манатгъа етишегенин айтды.

Республиканы экономикасында ягъарлыкъ-энергетика комплекс аслу тармакъланы бири.

– Мен биринчи иш башлагъан гюнюм деп тутуп, республиканы гьукуматыны алдына, шу тармакъда бар масъалаланы мекенли чечме салгъан эдим, — деди С.Меликов.

Республиканы башчысыны сёйлевюнден ачыкъ болгъаны йимик, электрик ярыкъ республиканы экономикасыны талапларын чечмей, электроэнергияны къытлыгъын япмакъ учун «Рус Гидро» ПАО Чиркей, Чирюрт ГЭС-лени реконструкция этме башлагъан.

Ондан къайры да, республиканы сиптечилиги булан «Рус-Гидро» 2027-нчи йылгъа Могох гиччи ГЭС къурма планлашдырылгъан.

Республиканы бир нече районларында гюнню гючю булан ишлейген электростанциялар къурмакъ учун гьазирлик чаралар гёрюле ва бир-бир районларда къурув ишлери юрюлюп тура.

Умуми алгъанда, 2024-нчю йыл болгъунча, республикада 380 МВт гючю булангъы гюн электростанциялар къурма гёз алгъа тутулгъан.

Сессиядагъы оьзюню сёйлевюнде Сергей Меликов республиканы газ хозяйствосуну ишин анализ этип сёйледи.

Республиканы башчысыны сёйлевюнде республиканы юрт хозяйство тармагъында етишген оьрлюклени, бу тармакъда бар кемчиликлени, айрокъда ГУП-ланы ишин танкъыт этди.

Республиканы башчысыны сёйлевю къысгъартылып бериле.