Охувчуланы уьстюнлюклери

Шоллукъда, 2022-нчи йылны январ айыны 28-нде Татарстан республиканы тахшагьары Къазанда «Истории славные страницы. Школы Героев» деген баш булан регионара конкурс оьтгерилди. Шо конкурсда Татарстан, Дагъыстан, Хакас республикаланы, Волгоград ва Киров областланы 1-11-нчи класланы охувчулары оьзлени ортакъчылыгъын болдурдулар. Шо конкурсну къыйматламакъ учун Къазан Федерал университетни филология институтуну ва Татарстанны билим беривню оьсювюне къарайгъан институтуну илму къуллукъчулары чакъырылгъан эди. Регионара конкурсда ону ортакъчылары оьзлени конкурс илму ишлерин 6 тюрлю бёлюкде малим этдилер.

Оьтгерилген конкурсда Къарабудагъгент гимназияны директоруну илму-методика ишлеге къарайгъан заместители Ругьаният Мусаева ва охувчулары ортакъчылыкъ этдилер.

Гьюрметли жюри чыгъаргъан конкурсну гьасиллерине гёре, гимназияны яшлары алдынлы ерлеге ес болдулар.

Ачыкълашдырып айтгъанда, «Дагъыстанны маданиятыны оьсювюню тарихинде Агъай Къаплановну ролю» деген проект булан 10-нчу класны охувчусу Магьамматжамил Къапланов 1-нчи ерни къазанды (илму ёлбашчысы Ханза Алиева); «Къарабудагъгент юртну тарихинде мени ата-бабаларымны – татарланы къысматы» деген проект булан 10-нчу класны охувчусу Исмайыл Къурмалиев 2-нчи ерге ес болду (илму ёлбашчысы Ханза Алиева); «Мени халкъымны тарихинде Абусупиян Акаевни ролю» деген проект булан 8-нчи класны охувчусу Амина Къурбанова да 2-нчи ерге ес болмагъа бажарды (илму ёлбашчысы Ругьаният Мусаева); «Абдусалам Абакаров – Граждан давну игити» деген проект булан 8-нчи класны охувчу Нюрият Османова 3-нчю ерни алды (илму ёлбашчысы Ругьаният Мусаева); «Мени халкъымны зияратлары» деген проект булан 8-нчи класны охувчусу Мадина Сулейманова 3-нчю ерни къазанды (илму ёлбашчысы Ругьаният Мусаева).

Олай да, гимназияны директоруну орунбасары Ругьаният Мусаева да оьзюню «Гьалиги школаны шартларында ватандашлыкъ тюшюнювню яратыв» деген проект булан муаллимлени арасында 1-нчи ерге ес болду.

Алдынлыкъны къазангъан гимназияны муаллимин ва охувчуларын Къарабудагъгент юртну башчысы Магьамматсолтан Гьасанов ва Къарабудагъгент гимназияны директору Адил Салаватов къутлагъан ва олагъа дагъы да уьстюнлюклер ва оьрлюклер ёрагъан.