Еленмеген шагьар
«Къамав аш» деген гьаракатны узата туруп, Къарабудагъгент тарих-эл ахтарыв музейде январ айны 27-нде «Еленмеген шагьар» деген баш булан эсделик сагьат оьтгерилди. Чарада Къарабудагъгент гимназияны 5-нчи класларыны охувчулары ва школа-интернатны тарбияланывчулары ортакъчылыкъ этди.
Инг башлап охувчулар къамавдагъы Ленинградгъа багъышлангъан шиъруланы гёнгюнден охуду. Сонг охувчулар къамавдагъы шагьаргъа багъышлангъан сурат выставкагъа къарап чыкъдылар. Выставкада аслу ерни Таня Савичеваны дневнигинден алынгъан къолъязывланы суратлары елеген эди.
Музейни ёлбашчысыны, муаллимлени къамав аш гьакъдагъы хабарларына, ленинградлыланы къоччакълыкъларына, нечакъы къыйынлыкълар гёрсе де, олар шагьарын якълагъаны, душмангъа енгилмегени гьакъдагъы сёйлевлерине охувчулар бек тергевлю тынгладылар.
Чара охувчулагъа «къамав къарлыгъачлар» – ленинградлыланы яшавгъа ва уьстюнлюкге умутун уьзмейгенликни белгилейген къушланы суратларын уьлешив булан узатылды.
Сонг охувчулар экспозицияны алдында эсделик суратлар чыгъарды.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
