Адамланы санаву…
Гьаманда йимик, оьтген талатгюн, февраль айны 1-нде, район администрацияны жыйынлар оьтгерилеген уллу залында районну администрациясыны аппаратыны гезикли генгеши оьтгерилди. Генгешни барышында районну администрациясыны управлениелерини ва бёлюклерини ёлбашчылары булан бирче юртланы башчылары да оьзлени ортакъчылыгъын болдурдулар.
Оьтгерилген генгешни район администрацияны гьакимбашыны орунбасары Жалалутдин Жамалутдинов ачды ва юрютдю. Ол, генгешни ортакъчылары булан саламлашгъан сонг, Росстатны ДР-деги территориал бёлюгюню Къарабудагъгент район бёлюгюню баш касбучусу – эксперти Нажмулгьуда Гьасановну трибунагъа чакъырды ва “ВПН-2020” чараны гьакъында баянлыкълар бермеге таклиф этди.
Трибунагъа гётерилген Нажмулгьуда Гьасанов 2021-нчи йылны октябр айыны 15-нден ноябр айны 14-ю болгъунча бизин уьлкебизде юрюлген Бютюнроссия адамланы гьисап алыв (ВПН-2020) чараны гьакъында англатыв берди. Ол оьзюню сёйлевюнде “ВПН-2020” чара Къарабудагъгент районну территориясында оьтгерилгени гьакъда маълуматлар берди.
“ВПН-2020” чараны бизин районда оьтгермек учун 261 переписчик ва 27 контролёр къуршалгъан эди. Олай да, 1 переписчик МФЦ-де адамланы къабул этип турду. Шоллукъда, оьтгерилген адамланы гьисап алыв чараны алданокъ билдирилеген гьасиллерине гёре (предварительные итоги), Къарабудагъгент районда яшайгъан адамланы санаву 100 мингден айлангъан. Шо санав гьали де мекенли болуп тасдыкъ этилмегенге гёре, шону ташдырып айтмагъа болмайман»,- деп узатды Н.Гьасанов оьзюню сёйлевюн.
Росстатны Къарабудагъгент райондагъы жаваплы къуллукъчусуну баянлыкъларына гёре, гьисап алывну юрютеген жаваплы адамлар Магьачкъала ва Каспийск шагьарлар булан дазу тутагъан «Паравул», «Агъачавул», «Уьйташ» бавчулукъ жамиятларда буссагьат яшап турагъанланы да гьисапгъа алгъан.
Ону сёйлевюнден сонг сёйлеген район администрацияны башчысыны орунбасары Жалалутдин Жамалутдинов “ВПН-2020” чара районубузну, республикабызны ва савлай элибизни социал-экономика оьсювюне болушлукъ этежегин аян этди.
Ж. Жамалутдинов оьзюню сёйлевюн тамамлай туруп, районну халкъыны вакцина этдирив масъаласын гётерди. Демек, умуми алгъанда, уллу адамланы 60 проценти вакцина этдирген, коллектив иммунитет болгъан. Болса да, Ж. Жамалутдиновну маълуматларына гёре, районну ичиндеги бир-бир юртлар гьали де шо коллектив иммунитетге етишмеген. Ол ювукъ гюнлени ичинде шо натижагъа етишмеге юртланы башчыларына тапшурду.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
