Юрекге ювукъ ана тил

Чарада Къарабудагъгент гимназияны, Къарабудагъгент 3 номерли орта школаны муаллимлери ва охувчулары, Дагъыстанны яшёрюмлерини гьюрметли насигьатчысы, ДР-ни билим беривюню отличниги Умусалимат Бутаева, районну тамазаларыны Советини ва Жамият палатасыны председатели Абдулгьамит Мамагишиев, китапхананы актив охувчулары, Къарабудагъгентни адатлангъан маданият центрыны, музейни къуллукъчулары актив кюйде ортакъчылыкъ этдилер.

Чараны Къарабудагъгентни Агъай Къаплановну атындагъы эргишилени хору оьзлени «Мени аявлу элим» деген йыры булан ачды. Сонг сёз берилген районну маданият ва туризм бёлюгюню ёлбашчысы Найида Мурзаева Ана тилни халкъара гюнюн белгилемекни, ана тилни маънасы, ана тилни ролю гьакъда хабарлады.

Сонг баш китапханачы Азинат Пашаева да ана тилни асиллиги гьакъда сёйледи.

- Ана тил бизин учун инг ювукъ, инг асил тил. Ол бизин юрекге ананы сютю булан синге, анабыздан биринчилей ана тилни эшитебиз. Гьар адам оьзюню ана тилин билме де, сюйме де борчлу…, — деди ол.

Сёз берилген Къарабудагъгент 3 номерли орта школаны охувчулары ана тилге багъышлангъан шиъруланы гёнгюнден охудулар.

Сонг сёз берилген А. Мамагишиев де охувчуланы ата-бабаларыбыздан къалгъан ана тилибизни билмеге, ана тилде сёйлемеге чакъырды.

Ана тилни терен маънасы гьакъда сёйлеген У.Бутаева охувчулар учун кёп пайдалы затланы айтды. Ана тилни аривлюгю, байлыгъы гьакъда охувчулагъа, мисаллар гелтире туруп, хабарлады.

Сонг сёйлеген ана тил дарсланы муаллимлери Написат Сайитова ана тилге багъышлап оьзю къургъан шиъруну гёнгюнден охуду, Зюлфия Мамаева да ана тилни потенциалы гьакъда, бизин ругь байлыгъыбызны оьсдюрювде ону ролю, яшавгъа къаравубузну, маданиятыбызны ­оьсдюрювде, демек савлай яшавда ана тилибиз аслу ерни тутагъаны гьакъда айтды. Сонг ону ёлбашчылыгъы булан гелип ортакъчылыкъ этген Къарабудагъгент гимназияны охувчулары ана тилге багъышлангъан гёрюнюшню гёрсетди. Олай да, гимназияны охувчусу Айшат Алчагъырова Умсалимат Бутаеваны «Ана тилим – къумукъ тил» деген шиърусун гёнгюнден охуду. Къарабудагъгент адатлангъан маданият Центрны йыравлары Абдулазим Найипханов ва Аскендер Исрапилов ана тилге багъышлангъан йырланы йырладылар.