Дав ёлдашларын эсгердилер
Февраль айны 15-нде А. Тахо-Години атындагъы ДР-ни Милли Музейини филиалында, демек, Уллубийавулдагъы У.Д.Буйнакскийни атындагъы мемориал музейде, Ватандан тышда оьзлени асгер борчун кютген, къоччакълыкълар гёрсетген россиялылагъа багъышлангъан чара оьтгерилди.
Чарада Уллубийавул юртлу афгъанлылар ортакъчылыкъ этди. Олар : Къадирбек Алимурзаев, Бава Арсланалиев, агъа-инилер – Мухтарпаша ва Нюрмагьаммат Жанболатовлар, Къагьир Зайналов, Телей Иманалиев. Олар барысы да «Къоччакълыгъы учун» деген медаль булан савгъатлангъан.
Чараны барышында совет солдатланы игитлиги, фронтдагъы дослугъу ва бир-бирине кёмек этивю гьакъда хабарладылар.
Олай да, шо гюн афгъан давда къурбан болгъанланы атлары да эсгерилди. Демек, уллубийавуллу Абдулмуъмин Къойчакъаев афгъан давда оьлюп къайтгъаны айтылды. Огъар «Къызыл Юлдуз» ордени де берилген.
Чараны вакътисинде дюньядан чакъсыз гетген афгъанлыланы – Магьаммат Хасболатовну ва Умар Гьажихановну гьакъында да хабар юрюлдю.
Бизин элибизни асгер къуллукъчулары Афгъанистандан да арекдеги оьзге уьлкелерде болгъан агьвалатларда да оьзлени ортакъчылыгъын болдургъан. Илмитдин Магьамматов шолайлардан санала. Ол – Эфиопия уьлкеде болгъан дав агьвалатны ортакъчысы.
Чараны барышында Уллубийавул юрт администрацияны, Уллубийавул орта школаны муаллимлери ва охувчулары, клубну ва китапхананы къуллукъчулары ортакъчылыкъ этдилер.
Чараны ортакъчылары бир минут шыплыкъ булан афгъан давда къурбан болгъан Абдулмуъмин Къойчакъаевни, сонг да бугюнлерде арасында ёкъ Магьаммат Хасболатовну ва Умар Гьажихановну атларын эсгердилер.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
