Игит шагьарны эсделигине
Къарабудагъгент баш китапхананы къуллукъчулары февраль айны 2-нде совет асгерлер Сталинград шагьарда юрюлген давларда уьст гелгенли 79 йыл болагъанына багъышлангъан «Сталинград – унутулмайгъан шагьар, воин ва патриот» деген патриот сагьат оьтгерди.
Чараны аслу мурады – охувчуланы Уллу Ватан давда совет солдатлар Сталинград шагьарны душмандан азат этивде гёрсетген къоччакълыкълары, тарих агьвалатлар булан таныш этмек эди. Патриот сагьатны барышында «Къарабудагъгент район» муниципал районну маданият бёлюгюню ёлбашчысы, Къарабудагъгент 5 номерли орта школаны муаллимлери ва охувчулары, олай да китапхананы актив охувчулары ортакъчылыкъ этди. Чараны башында залгъа дав опуракълар булан чыкъгъан охувчулар Сталинград ябушувну игитликлерине багъышлангъан шиъруланы гёнгюнден охуду. Охувчулар ва китапхананы баш къуллукъчусу А.Пашаева Сталинград ябушувну, онда болгъан тас этивлени, гёрсетилген къоччакълыкъланы, бизин райондан шо давларда ортакъчылыкъ этгенлени гьакъында хабарлады.
Чарада ортакъчылыкъ этген маданият бёлюкню ёлбашчысы Н.Мурзаева 58 гюн шагьарны аманлыгъын болдурувда, душмандан азат этивде ортакъчылыкъ этген совет асгерлени бир бёлюгю тургъан Павловну уью гьакъда, Мамаев Курганны якълавда совет солдатлар гёрсетген къоччакълыкъланы гьакъында, бизин районлуланы, шоланы ичинде юртлуланы, шо давда этген къошуму гьакъда хабарлады.
Сёз берилген районну тамазаларыны Советини ва Жамият палатасыны председатели А.Мамагишиев охувчуланы эсине шо йылларда совет солдатлар гёрсетген къоччакълыкъланы сала туруп, оланы эсделигине абур этме, гьар даим эсинде сакълама чакъырды.
Чараны узата туруп, китапханачы Сталинград ябушувну гьакъындагъы «По страницам Сталинградской битвы» деген китапгъа гёре видеороликлер гёрсетди.
Нюрсагьадат
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.