Юртда янгы футбол майданча
Савлай республикада йимик, бизин районда да спортну гьар тюрлю журалары булан машгъул болмакъ учун яшлагъа бир тюрлю онгайлыкълар яратывгъа мекенли кюйде агьамият берилип геле. Ачыкълашдырып айтгъанда, артдагъы вакътилерде бизин районгъа гиреген юртланы къайсында да торайып гелеген яш наслуну вакиллери къаркъарасын чыныкъдырмагъа имканлыкъ береген тийишли кюйде ясандырылынгъан майданчалар къурашдырылып тура.
Шо да ерли гьакимлик къурумларыны ёлбашчыларыны ва далапчыланы бирге чалышывуну натижасы болуп токътай.
Шо якъдан алгъанда, «Билим берив идараларда футболну оьсдюрюв» деген яшавгъа гийирилген программагъа гёре хыйлы иш этилип тура. Шолай, алдагъы гюнлерде Манасгент юртда да эсгерилген программаны оьлчевюнде ерли школаны ювугъунда футбол майданча пайдаланывгъа берилди. Шо гьакъда айта туруп, оьзюню узунлугъу 20, генглиги де 40 метрге етишеген шо майданчаны къурашдырывда ва ясандырывда «Магомедов Г.М.» деген онгача иш гёреген предприятиеге къуршалгъан касбучулар ва ишчилер гьаракатын болдургъанын айрыча эсгермеге тюше.
Манасгент юртну башчысы Абузагьир Ягьияев билдирегени йимик, шо футбол майданчаны къурашдырывгъа, умуми кюйде алгъанда, 3 миллион 100 минг манат акъча харжлангъан. Шо акъча маяланы бир пайы, демек, 1 миллион 400 минг манат – далапчылар гёрсетген инсаплы кёмек. Бизге берген баянлыгъында А. Ягьияев гьалиги талаплагъа толу кюйде жавап береген шо футбол майданчаны къурашдырывгъа къол ялгъагъан Къарабудагъгент районну гьакимбашы Магьмут Амиралиевге, олай да, бары да юртлуларына оьзюню разилигин билдирди. Шону булан бирге, эсгерилген футбол майданча юртлу яшлагъа бош заманын гележекде пайдалы йибермек учун болушлукъ этежегине инананагъаны гьакъда да ташдырды.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
