Меню
16+

Сетевое издание "Району яшаву"  «Будни района»

02.12.2022 09:58 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Игитлени аналарына багъышлана…

Автор: Нюрбият Абдуллабекова

Наслудан-наслугъа гьар адам учун яшавунда инг де тарыкълы адам – ана. Ана оьзюню бютюн яшавун баласына багъышлай.

Россияда Аналаны гюню ноябр айны ахырынчы къаттыгюнюнде белгилене. Шолайлыкъда, алдагъы гюнлерде район администрацияны жыйынлар оьтгерилеген уллу залында Ананы гюнюне багъышланып, «Игитлени аналарына багъышлана» деген гьаракат оьтгерилди.

Шатлыкъ чараны Къарабудагъгент район администрацияны маданият бёлюгюню ёлбашчысы Найида Мурзаева ачды. Залда олтургъан бары да аналаны хас байрамы булан къутлагъан сонг олагъа жанлы гюллер тапшурулду. Сонг сагьнагъа Къарабудагъгент хас (коррекция) школа интернатны охувчулары чакъырылды. Олар аявлу аналагъа багъышлангъан шиъруланы гёнгюнден охуду.

Сонг оьзюгер сёз берилген Къарабудагъгент районну башчысы ­Магьмут Амиралиев залда олтургъан къатынгишилени Ананы гюню булан къутлай туруп, булай деди:

– Аявлу аналар! Сизин гьакъ юрекден Ананы гюню булан къутлайман. Сизге савлукъ, узакъ оьмюр, яшларыгъыздан сююне ва оланы сююндюре туруп яшамакъны ёрайман.

Украинада юрюлюп турагъан хас дав чарада ортакъчылыкъ этип турагъан къоччакъ уланларыбызны аналарына айрыча разилигимни билдирме сюемен. Сизин чыдамлыгъыгъыз, рагьмулулугъуз, герти игит уланланы оьсдюргенигиз саялы сизге баракалла. Биз сизин алдыгъызда баш иебиз, сизин булан оьктем болабыз ва уланларыгъызгъа сав-саламат къайтмакъны ёрайбыз.

Районну башчысыны сёзюнден сонг уланларын давгъа йиберген бары да аналагъа ДР-ни Халкъ Жыйыныны депутаты М.Байбулатовну атындан савгъатлар тапшурулду.

Олай да, байрам чараны барышында къатынгишилени советини дазу сакълав управлениесини председатели Ольга Арслангереева, Губден орта школаны муаллими Зулхужат Абдулвагьабова, дазулангъан мобилизациягъа къуршалгъан Тимур Байболатовну уьягьлюсю Анна Байболатова, къатынгишилени Союзуну Къарабудагъгент бёлюгюню председатели Гюлжанат Темирова ва ДР-ни ат къазангъан муаллими, РФ-ни умуми билим берив тармакъны гьюрметли къуллукъчусу Ниярханум Дурниязова сёйледилер. Оланы гьариси уланларын давгъа йиберип чыдамлы кюйде къарагъан аналаны якълап, олагъа разилигин билдирип ва уланларына уьстюнлюк булан къайтмакъны ёрап сёйледилер.

Байрам чараны ахырында Къарабудагъгент районну Россияны халкъларыны мердешли маданият Центрыны йыраву Абдулазим Найип­ханов къонакълагъа дав хас чараны къурбанларына багъышлангъан йырын савгъат этди. Залдагъылар бу йыргъа эретуруп тынгладылар.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

4