Къумукъ журналыбызны юбилейи

Чараны ачгъан ва юрютген Дёргели юрт китапхананы ёлбашчысы А.Изиева «Дагъыстанлы къатын» деген къумукъ журналыбызны тарихи гьакъда хабарлагъан.

-Январ айда бизин къумукъ журналыбызгъа 65 йыл тамамлана. Демек, журналыбызны юбилейи белгилене. Журнал Магьачкъалада инг башлап «Тавлу къыз» деген ат булан чыкъма башлагъан болгъан.

50-нчи йылларда «Тавлу къыз» деген журнал авар, къумукъ, лезги, лак, дарги ва табасаран тиллерде чыгъа болгъан. 1972-нчи йыл журнал «Женщина Дагестана» деп орус тилде чыкъма башлагъан. 1971-2016-нчы йылларда журналны баш редактору болуп Фазу Алиева ишлеген…..,-дей ол.

Сонг сёз берилген Дёргели 1 номерли орта школаны муаллимлери А.Багьавутдинова, Р.Ягьияева, С.Атаева, Г.Батырмурзаева, И.Жо­уллаева, Дёргели 1 номерли орта школаны китапханасыны ёлбашчысы Ж.Сайитова ва башгъалары оьзлер “Дагъыстанлы къатын” журналны кёп сююп охуйгъанлыгъы гьакъда айтгъан. Оьзлени сёйлевюнде олар журналда дагъыстанлы къатынланы загьматы, оланы уьстюнлюклери гьакъда язылагъанны эсгерелер. Олай да, журналда къатынгишилер учун кёп пайдалы насигьатлар болагъанны, тюрлю ашланы этилеген кюйлери язылагъанны, демек къатынгишилер учун кёп маъналы ва къужурлу макъалаланы охума ва билме болагъанын эсгере туруп, охувчуланы ана тилибизде чыгъагъан къумукъ журналыбызны огъумагъа, якъламагъа ва огъар язылмагъа чакъыргъан.

Сонг Дёргели китапхананы актив охувчулары Х. Муталимова, С.Агьатова, З.Закарьяев, Ф.Шагьвалиева, А.Жанмурзаева «Дагъыстанлы къатын» деген журналда печат этилген къумукъ шаирлерибиз У.Ибрагьимованы, Н.Арсланованы, Ш.Алишеваны, С. Мамаеваны, Г.Атаеваны шиъруларын гёнгюнден охугъанлар.