Гьакъ юрекден къутлайбыз

Айгум Айгумов 1937-нчи йылда Ленин районну Къарабудагъгент юртунда тувгъан. 1962-нчи йылда уьлкебизни тахшагьары Москвада Щукинни атындагъы Театр училищени (ВУЗ) битдирген. Къумукъ музыкалы драм театрны артисти, Дагъыстан пачалыкъ филармонияны чебер ёлбашчысы, Республика Рус драмтеатрны директору, къумукъ театрны директору болуп ишлеген.

1994-нчю йылдан берли Къумукъ музыка-драм театрны чебер ёлбашчысы, буссагьатгъы вакътиге ерли Дагъыстан республиканы театр чалышывчуларыны Союзуна ёлбашчылыкъ эте.

Айгум Айгумов Дагъыстан сагьнасына чыкъгъан биринчи гюнюнден, биринчи абатларындан тутуп, оьзюню РФ-ни театр инче саниятыны лап яхшы вакили гьисапда гёрсетме бажаргъан.

Россияны театр саниятыны гёрмекли чалышывчусу, шексиз пагь­мулу артист, бажарывлу иш къурувчу, ёлбашчы Айгум Элдарович Айгумовну яратывчулукъ пагьмусу лайыкълы кюйде багьалангъан. Ол бизин уьлкеде актёрланы арасында лап сыйлы ат саналагъан, «РФ-ни халкъ артисти» деген чинкде сыйлы атгъа ес болгъан (1997 й) «Дослукъ орден» (2008 й) булан савгъатлангъан.

Айгум Айгумов Дагъыстан республиканы Пачалыкъ премиясыны лауреаты (2012 й.), 2012-нчи йылда «Дагъыстан республиканы алдындагъы къуллукълары саялы», деген орден булан савгъатлангъан.

2016-нчы йылда Айгум Айгумовгъа, Маттиаса Клаузенаны ролюн уста кюйде ойнагъаны саялы, хрустальдан этилген «Мономахны шапкасы» тапшурулгъан.

2017-нчи йылда буса театр саниятны оьсювюне гёрмекли къошум этгени ва Дагъыстанны СТД-ни ёлбашчысы, Россияны СТД-ни секретариатыны уьюрю, Темиркъазыкъ Кавказда театр саниятны куратору Айгум Айгумовгъа лап оьр театр савгъат – «Алтын маска» тапшурулгъан.

Бугюнлерде Айгум Айгумов театрны чебер Советине ёлбашчылыкъ эте, актёр гьисапда спектаклларда ойнай, янгы-янгы спектакллар сала, къысгъача айтгъанда, гьали де ол яхшы яратывчулукъ формада.

Къарабудагъгент юртну ватандашларыны атындан бизин лап сююмлю артистлерибизни бири, юртлубуз Айгум Элдарович Айгумовну – 85-йыллыкъ юбилейи булан гьакъ юрекден къутлайбыз, къаркъарасына къатты савлукъ, узакъ оьмюр, яратывчулукъ ишинде дагъы да чебер келпетлер яратма насип ёрайбыз.