Вакцина этмеге чакъыраман
Барыбыз да билеген кюйде, артдагъы йылланы ичинде савлай дюньяда коронавирус инфекцияны яйылывуну масъаласы итти токътагъан. Гьар гюн сайын вирусдан авруйгъанланы санаву арта. Коронавирус инфекциягъа къаршы ябушув ёлланы излей ва ахтара туруп, алимлер гетген йыл аврувну енгме болагъан вакциналаны бир-нечесин гьазирлеген.
Шогъар гёре 2020-нчы йылны январ айындан башлап адамлагъа вакцина этилмеге башлангъан.
Гетген йылны ичинде районну ватандашларыны 46 проценти вакцина этдирген. Олар медицина, билим берив ва башгъа идараланы къуллукъчулары. Шоланы арасында вакцинаны пайдасына инангъан ва англагъан районну бир ерде де ишлемейген ватандашлары да бар.
Тек гьалиге эсгерилген процент нечакъы бола буса да аз, демек, коллектив иммунитет болсун учун вакцина этдирегенлени санаву кёп болмаса бажарылмай.
Мен гьар гюнлер булан иш уьстде коронавирусдан авруйгъанлар булан къатнашаман. «Спутник V» вакцинаны эки де компонентин этдиргенмен, заманы етишгенде ревакцинаны да этдирмеге къастлыман.
Бугюн дюньяда вирусну янгы «омикрон» штаммы яйылып тура. Шо вирус бек гючлю ва айланагъа тез яйыла. ВОЗ бизин гьайыбызны эте туруп, адамлар кёп жыйылагъан ерлерден, тюрлю чаралардан арек турма ва вакцина этдирмеге чакъыра.
Гьюрметли районлуларым, оьзюгюзню ва ювукъларыгъызны гьайын этигиз! Гьайсыз болмай, вакцинаны этдирип, вирусну яйылывуну алдын алайыкъ, тезликде аврувсуз, парахат, алдынгъы яшавубузгъа къайтмакъны гьайын этейик!
Гёзел Къурбанова,
участка врач-терапевт
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
