Тюшюмню гьайы этиле

Районубуз аграр районгъа гёре, юртлу загьматчылар гьар-тюрлю тармакъларда мол тюшюмлеге кюрчю салмакъны гьайын эте туруп айланалар. Язлыкълар чачма гёз алгъа тутулгъан участкалагъа ерли кюйлевючлер тёгюп, сюрюв ишлер юрюле.

Чакъны онгайлы гюнлеринден айрокъда юзюмчюлюк тармакъда чалышагъан фермерлерибиз уста кюйде пайдаланмакъны гьайын этип чалышалар. Айтагъаныкъ, юзюм тарлавларда дым сугъарыв, сыдра араланы толумлашдырыв ишлер, борланы оьзге къуллукълары кютюле.

Буссагьатгъы вакътиде токъташдырылмагъан далилеге гёре биз гьисап этеген кюйде 230 гектардан къолай ердеги юзюмлюклерде дым сугъарыв ишлер оьтгерилген.

«Гече юрюген, гюндюз сююнер» дегенлей, чакъны ­ачыкъ гюнлеринден пайдаланып, тюек бутавну башлагъан, къурумлу кюйде оьтгерип турагъан гиччи, уллу юрт хозяйстволар да бар. Масъала, районда лап уллу юзюмчюлюк хозяйство гьисапланагъан ООО Агрофирма «Герей-тюзню» коллективи, гьайт деп айтып, тюек бутав ишлени оьтгерип туралар.

Топуракъны хадирин билеген агьлюден чыкъгъан эркъардашлар Сайитовлар да юзюмню мол тюшюмюне мугькам кюрчю салывда топлангъан бай сынавну къоллап, борлагъа къуллукъ этелер. Айрокъда Абдулмугьит Сайитов борланы бары да къуллукъларын агротехника гёрсетеген болжалларда оьтгермекни, алдынлы технологияланы къолламакъны гьайын этип ишлей.

Ачыкъ гюнлени асувлу къоллай туруп, А.Сайитов 7 гектар ердеги юзюмлюклени тюегин бутап битген. Алдагъы гюнлерде ол «Беларусь» тракторгъа тиркелген хас алат булан юзюмлюклерини сыдра араларына ерли кюйлевючлер яйып тура эди.

Районда бутав ишлени башлагъан дагъы да фермерлерибиз бар. Юзюм тюеклени бутавну гьакъында сёз чыкъгъанда, бир тайпа касбучулар бутавну башлама тез, артда сувукълар болуп къалса, не болар дейгенлерде ёлугъа. Интернет гёрсетеген кюйде, бизин якъларда, борланы уьшютер йимик, сувукълар гёрсетмей. Бары да халкъ бутав ишлени эрте язбашгъа къойса, авлакъ ишлени заманында сан янлы кюйде оьтгерме адам гюч къайдан табылар деген сорав арагъа чыгъа.

«Аста юрюсенг, узакъгъа барарсан» дегенлей, бутав ишлени эртерек башлагъан фермерлер борланы оьзге къуллукъларын алгъасамай узатма болажакълар.

Бир зат ачыкъ: чакъны онгайлы гюнлерин авлакъ ишлени къурумлу оьтгерме бакъдырып, иш гёрсе пайдалы болур.