... Парахат болса яхшы

Артдагъы 2 йылны ичинде бютюн дюньяны елеген коронавирус аврувну гьакъында ва шо аврувдан авругъанланы ва оьлгенлени гьалы гьакъда бирев-биревге бек къыйналып айта. Олай да, шо аврувну юкъмакълыгъындан къоркъуп, адамлар бир-бири булан ёлукъмайгъан ва гёрюшмейген болду. Шу къувунлу гьал къачан болгъунчагъа узатылмагъа тарыкъ эди?!...

Коронавирус аврувгъа къаршы вакцина чыкъгъанны эшитген сонг, шону пайда гелтирегенлигине бир де шеклик тувдурмайлы, оьзге адамлар ва агьлюлер булан янаша биз де вакцинаны этдирдик.

Тек, Аллагьны къадарына гёре, уьягьлюм булан бирче больницагъа ятмагъа борчлу болдукъ. Бизин дос-къардашыбыз, авул-хоншубуз, къурдашларыбыз ва оьзгелер бизин савлугъубуз саялы кёп гьалек болдулар.

Докторланы гьаракаты ва гьай этивю булан 12 гюнден сонг больницадан уьйге чыкъдыкъ, къаркъарабызгъа ончакъы бек зарал болмады. Врачланы баянлыкъларына гёре, оьз заманында этилген вакцинагъа гёре, бизин къаркъарабыз шо аврувну енгил оьтгерди. Больницада ятгъан вакътибизде арабыздан хыйлы тайгъанланы гёрдюк, шоланы гёрген сайын, юреклерибиз къысыла, гёнгюбюз бузула эди.

Вакцинаны этдирмеге сюймейген адамланы ойларына ва пикруларына тынгласанг, тамаша боласан. Айтагъаным, вакцина этдирген адам коронавирус аврувдан енгил авруйгъанына барыбыз да шагьатбыз. Шо гьакъда алимлер ва докторлар да айта.

Аврувдан къоркъуп ва инжинип турагъан халкъ, вакцинаны этдирген сонг, оьзлени яшаву ва турушу парахат болгъанлыгъы, вакцинаны тез этдирип юрегин рагьат этмегенине, аврувдан къоркъуп ювукълары булан къатнашмай тургъанына гьёкюнегени гьакъда магъа кёплери айтгъан.

Къоркъув адамны гьар тюрлю аврувлар булан гюнлени, айланы ва йылланы узагъында оьлтюре деп айтмагъа ярай. Шо саялы да, вакцинаны этдирип, парахат болса яхшы тюгюлмю?!

Оьзюгюзню ва дос-къардашларыгъызны аягъыз!

Гюлбике Абукова,

Къарабудагъгент гимназияны орус тилден ва адабиятдан

муаллими, ДР-ни ат къазангъан муаллими, 45 йыл стажы булангъы загьматны ветераны