Вакцина этдирив – лап аслу масъалаланы бириси
Январ айны 11-нде районну жыйынлар оьтгерилеген уллу залында районну гьакимбашы Магьмут Амиралиевни ёлбашчылыгъыны тюбюнде бу йыл биринчилей генглешген аппарат генгеш оьтгерилди. Жыйында администрацияны бёлюклерини ёлбашчылары, юртланы башчылары, райцентрде иш гёреген къурумланы ёлбашчылары, районну школаларыны директорлары, яшлар бавларыны заведующийлери ортакъчылыгъын болдурдулар.
Районну башчысы М.Амиралиев генгешни гиришив сёз булан ача туруп, районну активин Янгы йыл булан къутлады, къаркъараларына къатты савлукъ, ишинде уьстюнлюклер ёрады.
Январ айны 11-нде оьтген районну аппарат генгешинде ватандашлар вакцина этдирив масъала янгыдан агьамиятлы максъала болуп токътагъан.
Чараны барышында районну халкъы коронавирус инфекция аврувгъа къаршы вакцина этдиривню гьакъында район больницаны баш врачы Расул Гьиравов маълумат берди. Ону сёйлевюнде ачыкъ болгъаны йимик больница оьтген вакътини ичинде 30500 доза вакцина алгъан. Районну 21800 ватандашы вакцина этдирген. Расул Гьиравов дагъы да Янгы йыл байрам каникулланы ичинде 1800 адам вакцина этдиргенни эсгерди. Къарабудагъгент район больницаны баш врачы чарада сёйлевюн тамамлай туруп, февраль айны 1-не районну эсли халкъыны 60 проценти вакцина этдирме тарыгъын айтды.
Сонг чарада Роспотребнадзорну Каспийск шагьаргъа ва бизин районгъа къарайгъан управлениесини ёлбашчысы Омар Абачараев чыгъып сёйледи. Ону сёзюнден ачыкъ болгъаны йимик, районда коронавирус инфекция аврувдан авруйгъанлар аз болгъан, тек рагьатланма гьалиде тез. Коронавирус алышына, янгы штаммлар арагъа чыгъа, шо саялы вакцина этивню узатма, иш ерлерде, сатыв-алыв идараларда санитар-гигиена талапланы къатты кюйде юрютме, жамият ерлерде маска гийивню давам этме чакъырды.
О.Абачараев сёйлевюн тамамлай туруп, юртланы башчыларын ватандашланы арасында вакцина этдирив гьаракатны гючлендирме, февраль айны башына токъташдыргъан санавгъа етмек учун гьаракат этип ишлеме, ватандашланы арасында англатыв ишлени гючлендирме чакъырды.
Генгешде оьзюню гьасил чыгъарып сёйлевюнде районну башчысы М.Амиралиев вакцина этдиривге байлавлу маълумат-англатыв гьаракатны гючлендирме, ерлерде къурулгъан ишчи группалагъа рейд чараланы узатма къатты тапшурувлар берди.
«Халкъланы вакцинация этив – бизин жамиятда лап агьамиятлы ва тарыкъ иш»,-деди М.Амиралиев.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
