Биринчи ерни алып къайтгъанлар

Тийишли шартлар болдурулса, шо тармакъда чалышагъан тренерлер оьзлени тапшурувларына жаваплы янашып ишлесе, натижалар бола.

Янгы башлангъан 2022-нчи йылны январ айыны 2-ден 4-ю болгъунча Пятигорск шагьарда Къыбла Федерал ва Темиркъазыкъ Кавказ федерал округларда 2004-2005 ва 2006-2007-нчи йылларда тувгъан яшёрюмлени ДЮСШ-ни командаларыны арасында мини-футболдан биринчилик учун ярышлар оьтген. Шо ярышларда Темиркъазыкъ Кавказдан 16 команда ортакъчылыкъ этген.

Чёп салывдан сонг ярышланы сиптечилиери командаланы шулай тизген:

А-группа

1.«СШОР-6» (Пятигорск шагьар)

2.«РСШОР» (Элиста шагьар)

3.«СШ по футболу» (Ставрополь шагьар)

4.«ДЮСШ» (КГО)

Б-группа

1.«Уралан» (Элиста шагьар)

2.«ДЮСШ» (Лермонтов шагьар)

3. «Спартак-Юниор» (Георгиевск шагьар)

4.«Мир» (Миллерово шагьар)

В-группа

1.«Маяк» (КГО)

2.«ДЮСШ-Старт) (Курская станция)

3.«ДФЦ-Нарт» (Черкесск шагьар)

4.«Спартак» (Будённовск шагьар)

Г-группа

1.«РСШ-Ангушт» (Малгобек шагьар)

2.«Машук» (Пятигорск шагьар)

3.«ДЮСШ-Арафат» (Къарабудагъгент район)

4.«ФК Ессентуки» (Ессентуки шагьар)

Бизин районну «Арафат» деген командасы оьзлени группасындагъы 3-де команданы утуп, ярышланы ¼ финалына чыкъгъан. Бу гезик бизин районну командасы Миллерова шагьарны «Мир» деген командасы булан тогъа тартгъанлар. Къаныгъывлу гьаракатны натижасында бизин районну «Арафат» деген командасыны футболистлери оюнну 1:0 санав булан оьзлени пайдасына битдиргенлер. ½ финалда бизин районну командасы ерли «СШОР-6» командадан уьст гелген ва ярышланы финалына чыкъгъан.

Финал оюнлар къаравчуланы иштагьын гётерип, бек къужурлу оьтген. Ингушетияны «РСШОР-Ангушт» командасы ва бизин районну командасы финалда яхшы оюн гёрсетгенлер. Къарабудагъгент районну «Арафат» командасы финал оюнну 3:2 санавгъа утуп, биринчи ерге ва Къыбла федерал ва Темиркъазыкъ Кавказ федерал округланы алдынлысы деген атгъа ес болгъанлар. Биз районну «ДЮСШ — Арафат» командасыны футболистлерин ва оланы тренерлерин янгы йылда къазангъан биринчи уьстюнлюгю булан гьакъ юрекден къутлайбыз.

Бизин районну ДЮСШ-ни футболистлери тренерлер: Магьаммат Магьамматовну, Камал Паталиевни, Акав Акавовну ёлбашчылыгъыны тюбюнде тарбияланалар.