Уллубийавул орта школада
Районубузну ичиндеги оьзге школаларда йимик, Уллубийавул орта школада да сентябр айны 1-нде Билимлени гюнюне багъышлангъан шатлы чара оьтгерилди. Коронавирус аврув себепли болуп, бу йыл янгы охув йылны башланывуна багъышлангъан чараларда ортакъчылыкъ этеген адамланы санаву аз болмагъа таклиф этилген эди. Шолай болмада да болду.
Уллубийавул орта школаны майданчасы, гьаманда йимик, Билимни гюнюне байрамча безенген эди. Бу йыл, оьзге йылларда йимик, байрамны барышында школаны бары да охувчулары оьзлени ортакъчылыгъын болдурмады. Айтагъаным, Билимни гюнюне багъышлангъан шатлы чарада школаны муаллимлери, 11-нчи класны охувчулары ва 1-нчи класгъа янгы гелеген охувчулар оьзлени ортакъчылыгъын болдурду.
Гьаманда йимик, шатлы чараны Уллубийавул орта школаны ёлбашчысы Муъминат Умаева оьзюню къутлавлары ва ёравлары булан башлады. Ол оьзюню сёйлевюнде муаллимлеге ва охувчулагъа савлукъ, насип ва яхшылыкълар ёрады.
Уллубийавул орта школаны шатлы чарасында Къарабудагъгент район администрацияны башчысыны орунбасары Жалалутдин Жамалутдинов да ортакъчылыкъ этди ва къутлав сёз булан сёйледи. Ол уллубийавуллуланы башлангъан янгы охув йыл булан къутлай туруп, районну башчысы Магьмут Амиралиевни атындан салам берди, муаллимлеге ва охувчулагъа ачыкъ кёкню тюбюнде савлугъу булан насипли кюйде яшамагъа ва билимлеге ес болмакъны ёрады.
Олай да, оьтген чараны барышында Уллубийавул юртну башчысы Руслан Абуев, Уллубийавул орта школаны башлапгъы класларыны завучу Рабият Магьамматова къутлав сёзлер булан сёйледилер ва оьзлени ёравларын айтдылар.
Уллубийавул орта школада 2021-2022-нчи охув йылны башланывуна багъышлангъан зенгни 11-нчи класны охувчусу Шиханмат Паталиев ва 1-нчи «а» класны охувчусу Фатима Жанболатова къакъдылар. 103 охувчу школагъа янгы абат алдылар.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
