Гёз алгъа тутулгъан ишлер...

-Магьаммат Абугьанипаевич,­ белгили кюйде, артдагъы йылларда районну башчылары яшёрюмлени, олай да гиччипавланы гьайын этегени айрыча гьис этиле. Демек, “яшлар – бизин гележегибиз” экенин ташдыра туруп, олагъа яхшы болуп, оланы савлугъу болсун, билимлери ­артсын деп кёп иш этиле.

Шогъар гёре школаларда охув­чулар ремонт этилген школалагъа гирсин, оланы аманлыгъы болсун деп бизин районда не чаралар гёрюле? Олагъа эркин ва онгай­лыкълар болсун деп гьаракат этмек уллуланы борчу. Шо ёрукъда школаланы, яшлар бавларыны ремонт янгыртыв ишлени барышы гьакъда не айтма боласыз?

-Тюз, районну башчылары, олай да регионну башын тутгъанлар охувчулар ремонт этилинген школаларда охусун, олар учун бары да тарыкълы онгайлыкълар болсун деп гьаракат эте, демек, янгы школалар къурмакъны, бар школалагъа ремонтлар этип, янгыртып яшланы къаршыламакъны гьайында тура.

Буссагьат районда 67 билим берив ожакъ бар: 27 школа, 1 гимназия, 1 школа-интернат, 28 яшлар баву, 9 спорт школа ва 1 яшланы яратывчулукъ уью.

1-нчи сентябрде районну школаларында 15 150 охувчу парталагъа олтуражакъ. Ерлерибиз аз, демек школаларда тыгъыслыкъ бар, охувчулар учун гьалиде бары да онгайлыкълар ёкъ. Районну школаларында буса 9912 охувчугъа ер бар. Демек, районда, юртларда дагъы да янгы школалар къурулма гереги ачыкъ. Къарабудагъгент юртну айтып къойсакъ – янгыз 1 номерли орта школада ва гимназияда охувчулар учун тарыкълы онгайлыкълар бар деп айтма ярай. Къарабудагъгент 2,3,5 номерли орта школалар бек тыгъыс, Манас ва 3 номерли Паравул орта школаларда охувчулар 3 сменде охужакъ.

Демек, районда бар школаланы 50 проценти тюгюл эсе типовой школалар тюгюл, бир-бир школаланы спортзаллары ва пищеблоклары ёкъ. Озокъда биз шону уьстюнде кёп иш этебиз, гезиклетип ишни яхшылашдырмагъа гёз алгъа тутгъанбыз. Бу йыл охувчуланы къаршыламакъ учун ремонт ва янгыртыв ишлер этилген.

Районда 3 школаны: Аданакъ, Зеленоморск, Къакъамахи – гьалы бузукъ. Шолагъа да ремонт ишлер этилген. Охувчулар учун къоркъунчлукъ ёкъ. Эсгерилген юртларда янгы школалар къурмагъа гёз алгъа тутулгъан. Ондан къайры да, гелеген йыллагъа капитал ремонт федерал программагъа гёре, районну 6 школасына капитал ремонт этмек учун тарыкълы чакъы харжлар гёрсетил­ген. Паравул 2 номерли орта школагъа – 18378960 манат, Къурбуки 1 номерли орта школагъа 10675160 манат, Уллубийавул орта школагъа 19763420 манат, Манасгент орта школагъа 62075310 манат, Къарабудагъгент гимназиягъа 33214600 манат, Дёргели 1 номерли орта школагъа 53801410 манат гёрсетилген.

Шо капитал ремонт ишлени этмек учун бизин управлениени касбучулары объектлени проект-смета кагъызларын гьазирлеген, ДР-ни билим берив ва илму министерлигине берилген.

- Эсгерилген объектлер нечакъы заманны ичинде юрюлежек, демек ювукъ заманны ичинде бажарылар деп умут этме болабызмы?

- Гьар заман бир йимик алдын ерли къурулгъан плангъа гёре, иш юрюлмей къалма да бола. Тек шо ишлени бажарылса 2022-2024-нчю йылланы ичинде битдирмеге гёз алгъа тутгъанбыз.

Сонг да Къарабудагъгентде Сергендиравулда 700 яшгъа ери булангъы типовой школа къурмагъа гёз алгъа тутулгъан…

- Магьаммат Абугьанипаевич, сентябр ай – гюзню айы, узакъ къалмай къыш да гележек. Школаланы иссилик болдурагъан системалары гьазирми?

- Озокъда, бары да школаларда къышгъа гьазирлик гёрюлген. Исси этеген системалар ишге берилме гьазир.

Школаларда оттюшювню аманлыгъын болдурмакъ учун да бары чаралар гёрюлген, оттюшювню билдиреген къувунлу кнопкалар салынгъан…

- Бирдагъы керен бизин булан ёлукъма заман тапгъаныгъыз ва редакциягъа гелгенигиз саялы, сизге баракалла.

Гёз алгъа тутгъан ишлеригизни барысын да яшавгъа чыгъарма сизге Аллагь онгайлыкълар берсин!

- Сиз де савболугъуз!