Эсделик чара

Шо вагьши ишни этивде боевиклер уллулагъа чы нечик де, гьатта къучакъдагъы яшлагъа да ичмеге сув да бермеге ихтияр этмей эдилер. Ихтияр якълав къурумланы вакиллери билдиреген кюйде, ФСБ-ни къуллукъчулары шо террорчулукъ ишде лап да кёп оьзлени къуллукъчуларын тас этген.

1-3-нчю сентябрде Беслан 1 номерли орта школада болгъан терорчулукъ ишни натижасында 314 адам оьлтюрюлген. Шоланы ичинден 186-сы – яшлар. Олай да, болгъан вагьшиликде 800-ге ювукъ адам гьар тюрлю яралар алгъанлыгъы гьакъда медицина къурумлар ташдырды.

Шу оьрде эсгерилген къайгъылы гюнлеге багъышланып, Россияны бары да шагьарларында ва юртларында, айрокъда билим берив идараларында, эсделик чаралар оьтгериле. Олай да, сентябр айны 3-нде бизин уьлкебизде террорчулукъгъа къаршы ябушув билдиреген гюн белгилене.

Эсгерилген шо эсделик ва къайгъылы чараларда артдагъы 25-30 йылны узагъында террорчулукъ ишлерде жанын къыйгъан ва къурбан болгъан уллуланы, яшланы, полицияны къуллукъчуланы, дин ругьанилени ва оьзге ватандашланы атларын эсгере.

Шоллукъда, сентябр айны 2-нде, хамисгюн, Къарабудагъгент юртну Уллубий Буйнакскийни аты къоюлгъан ял алагъан пачалыкъ бавунда, террорчулукъгъа къаршы ябушув билдиреген гюнге багъышланып, эсделик чара оьтгерилди.

Чараны барышында Къарабудагъгент район администрацияны башчысыны орунбасары Жалалутдин Жамалутдинов, район администрацияны маданият ва туризм бёлюгюню ёлбашчысы Найида Мурзаева, район администрацияны прес-къуллугъуну ёлбашчысы, журналист ва шаир Багьавутдин Самадов, Къарабудагъгент юртну баш китапханасыны ёлбашчысы Айзанат Пашаева, Агъай Къаплановну атындагъы эргишилени хоруну ёлбашчысы Аскендер Исрапилов, Къарабудагъгент 2 ва 3 номерли орта школаланы муаллимлери ва охувчулары, ЦТКНР-ни йыравлары оьзлени ортакъчылыгъын болдурдулар.

Чараны башында йырав Аскендер Исрапилов оьзюню йырында адамланы парахатлыкъгъа, дослукъгъа, бирликге ва давсузлукъгъа чакъыра туруп йырлады.

Сонг чараны юрютювчю, баш ки­тапханачы А.Пашаева Россияны тарихинде болгъан террорчулукъ ишлени бир ягъадан гёзден гечирди, оланы къурбанларына лайыкълы сёзлер айтды.

Эсделик чараны барышында сёйлеген район администрацияны башчысыны орунбасары Ж.Жамалутдинов оьзюню сёзюнде террорчулукъ ишлер гьар заман къайгъы ва дерт гелтирегенни, шоланы натижасында уллулар булан бирче бир де такъсыры ёкъ яшлар да жазаланагъанны айтды. Сонг да, шолай къайгъылы ишлер бизин районубузда да болгъанны ва шоланы бир де унутмагъа тюшмейгенни ачыкъ этди.

Олай да, шо чараны барышында журналист ва шаир Багьавутдин Самадов «Янгур явду тёгюп сувукъ гёзьяшын» деген оьзюню шиърусун чебер кюйде охуду. Шо шиърусунда ол террорчулукъ ишни онгаргъан ва этген бандитлеге налат берди, шонда жанлары къыйылгъан уллулагъа ва айрокъда яшлагъа къыйналагъанын аян этди.

Къарабудагъгент 2 ва 3 номерли орта школаланы охувчулары да Беслан шагьарда болгъан террорчулукъ ишге багъышланып язылгъан шиъруланы гёнгюнден охудулар. Эсделик чараны ахырында йырав Умукюсюм Шамилова оьзюню йырын йырлады, охувчулар буса «Парахатлыкъны терегине» гёгюрчюнлени суратларын илдилер.