Яратывчу ва пагьмулу

Ол бек жагь, оьзюгер ва оьзгелеге талаплы, намуслу, рагьмулу ва жаваплы, демек, танглагъан касбуcун оьр даражада ва сан янлы кютмеге бажарагъан муаллим. Охувчулар ону дарсларына кёп сююп ва оланы башланывун къаравуллап бара.

Напуханым Къойчуева оьзюню ишине уллу усталыкъ ва яратывчулукъ булан янаша. Охувчуланы ол табиатны яшыртгъын сырларын англама, табиатгъа тергевлю болма, тынглама ва англама, гьис этме уьйрете. Н.Къойчуева оьзю булан ишлейген жагьил муаллимлеге гьар заман кёмегин болдурмагъа гьазир. Не заман кёмек тарыкъ болуп, олар ону ягъына барса да, олагъа бар затны англатма, кёмеклешме сюе. Жагьил муаллимлер ондан якълав таба, англамайгъанын сорай, ондан уьлгю алып ишлеме гьаракат эте. Ол ишлейген 30 йылны ичинде ону алдында юзлер булан охувчулар билимлер алып чыкъгъан. Напуханум Къойчуева гьар дарсда, переменада, оьтгерилеген тюрлю чараларда яратывчулукъ гьюнерлерин къоллай.

Не ишни башласа да, Н.Къойчуева бажарып ва ахырына чыгъып болмайлы къойгъаны ёкъдур…

Ол оьтгерилеген конкурсларда, конференцияларда, олимпиадаларда, семинарларда, выставкаларда, байрам чараларда актив кюйде ортакъчылыкъ эте. Н.Къойчуева школаны методбирлешивюню ёлбашчысы болуп чалышагъаны да 10 йыл бола.

Ону охувчулары район ва республика олимпиадаларда, конкурсларда ва конференцияларда ортакъчылыкъ этип, алдынлы ерлени къазана. Напуханум Къойчуева « Почётный работник общего образования РФ» деген атгъа ес болгъан, олай да кёп гьюрметлев грамоталар булан савгъатлангъан.

Тек ол билегенлери булан токътап къалма буссагьатда да рази тюгюл, гьар гюнлер булан янгы къайдаланы излеп, табып, ишинде оланы къоллавну уьстюнде чалыша, охувчуларына сан янлы билимлер бермеге, дарслагъа оланы интересин гётермеге, дарсланы къужурлу оьтгермеге гьаракат эте. Жаваплы, талаплы, пагьмулу, яратывчу муаллим башгъа къайдада ишлеме болмай ва билмей.