Янгы межитге сапар
21-нчи сентябрде Къарабудагъгент районну гьакимбашы Магьмут Амиралиев район администрацияны аппаратыны ёлбашчысы Жамалутдин Имакъовну ва «Карабудахкентское ДЭП №17» АО-ну генеральный директору Вагьапгьажи Алиевни узатыву булан Уллубийавулда къурулагъан янгы межитге сапар чыкъдылар.
Эсерилген гёзел межит тюрк осман къайдада 52 метр бийиклиги булангъы 4 минарасы булан къурула. Шо межит 2015-нчи йылны язбашында къурулмагъа башлангъан.
Сапарны барышында районну башчысы М. Амиралиев ва ону узатагъан ёлдашлар межитни къурмагъа бойнуна алгъан, ону сиптечиси, далапчы улан Абдурагьман Абдурагьманов булан ёлукъгъан ва майданчасын гёзеллендирмекни гьакъында хабарлагъан.
Айтагъаным, районну башчысы Магьмут Амиралиев межитни ачмакъ учун инг алда ону майданчасын тюзлемеге, онгармагъа, чакъа тёкмеге, огъар асфальт салмагъа тарыкълыгъын ачыкъ этген. Районну администрациясы пачалыкъны бир программасына гёре, тротуарланы ва машинлер учун хас “стоянканы” асфальт этмеге бойнуна алмагъа сюегенин англатгъан. Олай да, межитни къырыйларын да безендирежегин айтгъан.
«Карабудахкентское ДЭП №17» АО-ну генеральный директору Вагьапгьажи Алиев, оьзюню гезигинде, оьзю ёлбашчылыкъ этеген идараны къуллукъчулары сан янлы кюйде асфальт салажагъын ва шо ишни оьз болжалында битдирежегин ачыкълашдыргъан.
Районну гьакимбашы М.Амиралиев «Карабудахкентское ДЭП №17» АО-ну генеральный директору В.Алиевге межитни майданчасын асфальт этмеге ювукъ арада гиришмеге тапшургъан ва тезликде битдирмеге таклиф этген.
Сапарны вакътисинде районну башчысы М.Амиралиев ва ону ёлдашлары межитни ичине гирген, ону аривлюгюне, гёзеллигине, гьайбатлыгъына ва архитектура къурулушуна сукълангъан ва гьайран къалгъан.
Уллубийавулда Абдурагьман Абдурагьманов къурагъан гёзел межит бугюнге Дагъыстанда 4 минарасы булангъы биринчи межит санала.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.