Тергевлю ва адилли

Бар пагьмусун, гьаракатын, гючюн бакъдырып, гележек наслугъа билим ва тарбия береген муаллимлени арасында Къарабу­дагъ­гент 2 номерли орта школаны къумукъ тил ва адабият дарсларын юрютеген Гьабилляева Лайла Абдулмуъминовна да бар.

Лайла Гьабилляева бек тергевлю, кёмекге гьазир, рагьмулу, адилли адам.

Демек, педагогда болма герекли хасиятлар: пагьму, иссилик, гьакъыл, гишини ойлайгъанлыкъ, жагьлыкъ, чыдамлыкъ – олар барысы да Лайла Гьабилляеваны уьстюнде бар.

Ол касбусуна толу кюйде берилип ишлейген, гьакъ юрекден этеген ишин де, охувчуларын да сююп бажарагъан муаллим. Л.Гьабилляеваны иш уьстдеги аслу мурады – асталыкъ,­ усталыкъ, сакълыкъ булан яш наслугъа пагьмуларын аян этмеге, олагъа гележекге инамлыкъ болдурмагъа, оьзлеге, этеген ишине багьа бермеге уьйретмек болуп токътай.

Ол гьар яшны, охувчуну гьаракатына, билим якъдан оьсювюне, оьзбашына ишлейген кююне тергев бере, оланы айланагъа къарамагъа, бары затны тергемеге ва эс этмеге уьйрете.

Рагьмулу, тек шону булан бирче талаплы ва низамлы муаллим оьзю де бар затны билмеге ва охувчуланы да уьйретмеге гьаракат эте. Охувчуланы билимлеге алдын бакъдырмагъа, янгы ва билмейген затланы билмеге интересин гётере. Л.Гьабилляева район ва республика оьлчевде оьтгерилеген конкурсларда актив кюйде ортакъчылыкъ эте, оьзюню касбу усталыгъын гёрсете. Шолай, 2021-нчи йыл ол «Лучший учитель родного языка – 2021» деген район конкурсда ортакъчылыкъ этип, алдынлы ерни алды. Сонг ол бизин райондан республика конкурсда да ортакъчылыкъ этди.

Лайла Гьабиллияева яшёрюмлеге тарбия ва билим беривде етишген уьстюнлюклери саялы, район ва республика оьлчевде гьюрметлев грамоталар булан савгъатлангъан.