Сайлавланы гьасиллерине къаралды

Чараны районну башчысы Магь­мут Амиралиев ачды ва юрютдю.

М.Амиралиев залдагъылар булан саламлашып битген сонг, оьзге ерлерде йимик, бизин районда да коронавирус инфекция аврув себеп болуп, сентябр айны 17-ден 19-у болгъунча РФ-ни Пачалыкъ Думасыны 8-нчи чакъырывуна, олай да, ДР-ни Халкъ Жыйыныны 7-нчи чакъырывуна депутатлар сайламакъ учун оьтген сайлавланы гьасиллери гьакъда гьисап берме районну территориал сайлав комиссиясыны председатели Магьамматсайит Алпанаевни трибунагъа чакъырды.

Районда 3 гюнню узагъында ­оьтген сайлавланы гьакъында айта туруп, ол булай деди:

-Пачалыкъ Думаны федерал Жыйынына 8-нчи, олай да ДР-ни Халкъ Жыйынына 7-нчи чакъырывуна депутатлар сайлав кампания районда оьр даражада, бирев де сёз табып болмас йимик, ачыкъ, тюз ­оьтгенин ташдырды. Шо гюн районну 5 муниципалитетлеринде юрт Жыйынлагъа депутатлар да сайланды. “Манасгент муниципал къурулувну” юрт Жыйынына янгыдан депутатлар сайланды.

Магьамматсайит Алпанаев сезюн давам эте туруп, районда РФ-ни Пачалыкъ Думасына ва ДР-ни Халкъ Жыйынына депутатлар сайлав кампанияны оьр даражада къурумлу кюйде оьтгермек учун аслам къошумун болдургъан районну башчысы Магьмут Амиралиевге, юртланы башчыларына, оьзге жаваплы къуллукъчулагъа баракалла билдирди.

ТИК-ни ёлбашчысы М.Алпанаев залдагъылагъа оьтген сайлавланы гьасиллерин малим этди.

Уьч гюнню узагъында оьтген сайлавларда 46139 сайлавчу ортакъчылыкъ этген. Процент гьисапда шо 88,61 бола. Сайлавларда «Бютюн Россия» политика партиягъа сайлавчуланы 71 проценти тавуш берген. «Справедливая Россия – Патриоты – За правду» деген социалист политика партиягъа сайлавчуланы 28 проценти оьзлени тавушларын бергенлер.

Къалгъан партиялагъа сайлавчуланы умуми санавундан бир процентден де аз тавуш берилген.

Бир мандатлы 11-нчи округдан РФ-ни Пачалыкъ Думасына кандидатланы арасында Мурат Станиславович Гьажиевге сайлавларда ортакъчылыкъ этген сайлавчуланы 83,22 проценти тавушларын берген.

Оьтген сайлавларда ДР-ни Халкъ­ Жыйынына кандидатураларын сал­гъан Магьамматсолтан Магьамматовну ва Магьамматали Адзиевни, районну сайлавчулары бир гёнгюлден якълап, сайлагъанын бирдагъы керен ташдырды.

Чараны жамын чыгъарып сёйлей туруп, районну башчысы М.Амиралиев залдагъыланы политика агьамияты булангъы сайлавланы оьр даражада оьтгермек учун гьаракатчылыкъ гёрсетип, ишине жаваплы янашгъан юртланы башчыларына, оьзге ёлдашлагъа разилигин билдирди.

Магьмут Амиралиев сайлавланы гюнлеринде къоркъунчсузлукъну, низамны болдурувда оьз къошумун болдургъан районну ихтияр якълав къуллукъчуларына да баракалласын билдирди.

Бизин райондан ДР-ни Халкъ Жыйынына сайлангъан эки де депутатны къутлады. Олар районубузну, республиканы экономикасын гётеривде, районну халкъыны яшав гьалын яхшылашдырывда, социал масъалаланы чечивде арымай-талмай гьаракат этежегине инанагъанын яшырмады.

Чараны ахырында районну башчысы М.Амиралиев, оьзге ерлерде йимик, бизин районда да коронавирус инфекция аврувну къоркъунчлугъу артса тюгюл, кемимеген деди. Шо саялы юртланы башчыларына ватандашлар вакцина этсин учун англатыв ишлени гючлендирме, оьзге чараланы гёрме чакъырды.

Гьал шулай къалса, районда дазуланыв чаралар гючленме болма болагъанын эсине салды.